Poloniya Tış işleri nazirligi Rusiyeni, Qırım ilhaqını toqtatmağa davet etti ve, Moskva halqara uquqqa riayet etmege başlamağance, onı sanktsiyalar «taqip etecek», dep saqındırdı.
Beyanatta: «Biz Rusiyeniñ Ukrainağa qarşı areketlerine qatiy narazılıq bildiremiz. Ukrainanıñ topraq bütünligine qol tutamız ve Qırımnı bu devletniñ bir qısmı sayamız. Demokratik dünya toplulığı ile beraber Rusiyeni, Qırım işğalini toqtatmaq ve tış siyasetini ömürge keçirmek içün saylağan küç qullanuv strategiyasından vazgeçmege ğayrıdan davet etemiz», – denile.
Poloniyanıñ TİNinde, Rusiyeniñ areketleri dünya havfsızlıq sistemasınıñ stabilsizligini arttıra ve halqara munasebetlerde kerginlikniñ artmasına ketireler, dep qayd ettiler.
Bildirüvde: «Biz, cümleden Qırımdaki azlıqlarğa qarşı qullanılğan tecavuz ve qorquzuv siyasetine qail degilmiz», – denile.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
