Qırım ukümetini mart 18-de Kreml tarafından ilhaq etilgen Qırımda ötkerilecek olğan Rusiye prezidenti saylavında eñ evelâ saylavcılarnıñ iştiraki raatsızlay.
Bunı «Qırım.Aqiqat TV» içün bergen izaatta Qırımtatar Milliy Meclisiniñ reisi Refat Çubarov bildirdi.
Çubarov: «İşğalci ukümet, «saylav» adınen ötkerilgen bu qanunsız ayın-oyun esnasında özüne kerek olğan neticelerini yazmaq içün tolusınen azırlandı. Olarnı şimdi saylav kampaniyanıñ tek bir ceeti raatsızlay. O da, saylavcılarnıñ bölüklerge kelmesi. İnsanlar nasıl rey berecek, ya da atta şu bülletenlerni bozacaqlarmı, olar içün meraqlı degil. Olar içün, dünyağa köstere bilecekleri, az-buçuq qabul etile bilecek resim kerek. Ve olar, mart 18 sabasında bunı yapacaqlar. Aynı zamanda, işğalni qabul etmegen insanlar – olar çoqluqtadır – olar şimdi ağır bir tüşüncelerge dalğan, çünki insanlarğa qarşı misli olmağan tazyıq ve işten çıqarılacaqlarına dair qorquzuvlar yapıla», – dep iddia ete.
Onıñ aytqanına köre, 2014 senesi mart 16-da (dünyada tanılmağan Qırımdaki «referendum» kününde) olğanı kibi, mart 18-de de bayağı adamlar, menligini saqlap qalacaqlarmı, ya da kene de baş egeceklermi, saylamaq mecbur olacaqlar».
Çubarov: «Men bilem, qırımtatarlarnıñ çoqusı baş egmeycek», – dep, ilâve etti.
Rusiye prezidentiniñ saylavını ilhaq etilgen Qırımda da ötkermek isteyler. Saylav içün azırlanğan bülletenlerde sekiz namzetniñ adı qayd etildi – Sergey Baburin, Pavel Grudinin, Vladimir Jirinovskiy, Vladimir Putin, Kseniya Sobçak, Maksim Suraykin, Boris Titov ve Grigoriy Yavlinskiy.
Yanvar ayında Çubarov, er bir milletten olğan Qırım sakinlerini Rusiye prezidenti saylavını boykot etmege davet etti.
Kreml tarafından tayin etilgen Qırım başlığı Sergey Aksönov, qolu astında çalışqanlarnı Rusiye prezidenti saylavına barmamağa çağırğan memurlarnı, işten çıqarılacaqları ile qorquza edi.
Fevral 16-da Ukraina prezidenti Petro Poroşenko dünya toplulığını ilhaq etilgen Qırımda kelecekteki Rusiye prezidenti saylavınıñ neticelerini tanımamağa davet etti.
İlhaq etilgen Qırımda Rusiye prezidenti saylavınıñ tanılmaması aqqında ABniñ tış işleri ve telükesizlik siyaseti boyunca Yüksek temsilcisi Federika Mogerininiñ beyannamesinde bildirile.
