İlhaq etilgen Qırım sıcaq noqtağa çevirile ve Qara deñiz bölgesiniñ tışında da Avropa havfsızlığı içün telüke doğura. Bunı Amerika Sesi efirinde Ukrainanıñ BMTdeki temsilcisi Vladimir Yelçenko söyledi.
Diplomat: «Qırım yalıñız qanunsız ilhaq etilgen manasına degil, aynı zamanda yalıñız Qara deñiz bölgesinde degil de, ondan bayağı keniş saada Avropa içün telüke doğurğan manada «sıcaq noqta»ğa çevirile», – dedi.
Onıñ aytqanına köre, BMTde Qırımnıñ artmaqta olğan arbiyleştirilmesine ciddiy yanaşalar.
Ukrainanıñ BMTdeki temsilcisi: «Bizde olğan malümatqa köre – o, NATO azalarında da bar – Rusiye, Qırımda nükleer silânı yerleştirmek içün temel azırlay. Bu, ğayet ciddiydir», – dep bildirdi.
Ondan ğayrı, Yelçenkonıñ aytqanına köre, Rusiye Qırımnı, ağır silâlar ve askerlerini Suriyege taşımaq içün qullanmağa devam ete.
Ukrainada NATO ofisi mudiriniñ muavini Ann-Kristin Bergene, Qırımnıñ arbiyleştirilmesi ve Qara deñiz bölgesinde Rusiye arbiy bulunuvınıñ kenişlemesi munasebeti ile ciddiy endişe bildirdi.
2018 senesiniñ başında Rusiye arbiyleri Aqyardaki Fiolent burnu etraflarında S-400 «Triumf» zenit-raketa kompleksleriniñ ekinci divizionını yerleştirdiler. Jurnalistlerge, raketa sisteması Qırımnıñ qıtadaki Ukraina ile memuriy sıñırı keçken Çoñğar ve Ermeni Bazar (Armânsk) üstündeki kökni kontrol etecek, dep añlattılar.
