İlhaq etilgen Qırımnıñ sabıq prokurorı, Rusiye Devlet Dumasınıñ yarımadadan deputatı Natalya Poklonskaya, Rusiye Merkeziy saylav komissiyasına (TsİK), prezident namzeti Kseniya Sobçaknı, Rusiyeniñ topraq bütünligine qast etüv ve Qırım sakinlerine sayğısızlıq kösterüv içün saylavdan çıqarmaq talabını yollağanını bildirdi.
Rusiye kütleviy haber vastaları (KHV), Poklonskayanıñ sözlerini naqil etip: «Özüni öyle tutmaq ve Qırım sakinlerine sayğısızlıq köstermek mumkün degil. Tabiiy ki, men susıp olamayım. Men bu sebepten munasip deputat talabını TsİK reisiniñ adına yolladım, ve qanunnı bozğan içün prezident namzeti Sobçaknı qayddan çıqarmaq rica etem. Men, buña bir de bir qarşılıq vesiqası olacağına umüt etmeyim, lâkin biz, Qırım ve Aqyar sakinleri, öz noqtai-nazarımıznı bildirdik, ve bizge böyle munasebet köstermek kerek olmağanını numayış ettik. Biz – Rusiyemız, ve biri bunı begenmese, bu, bizim degil de, onıñ işidir», – dep yazalar.
Poklonskayanıñ aytqanına köre, prezident namzetiniñ, «halq ögünde, Rusiyeniñ bir qısmı ülkege ait degil, demege aqqı yoq», dep bildireler KHV.
Ondan ğayrı, Rusiye neşirleriniñ yazğanına köre, Sobçak, Qırımnıñ statusına dair sözleri ile Rusiyeniñ topraq bütünligini şübhe altına qoya ve, Qırım sakinleriniñ territorial alâmetke köre tam degerli olmağanlarını söylep, federal qanunnı boza.
KHV: «Bu, qabul etilmez, ve federal qanun ile yasaq etilgen», – dep, Poklonskayanıñ sözlerini naqil eteler.
Rusiye prezidentiniñ saylavı 2018 senesi mart 18 kününe – Qırımnıñ Rusiye tarafından ilhaqınıñ yıllığına tayın etildi. Onda sekiz namzet iştirak etecek – Sergey Baburin, Pavel Grudinin, Vladimir Jirinovskiy, Vladimir Putin, Kseniya Sobçak, Maksim Suraykin, Boris Titov ve Grigoriy Yavlinskiy.
Fevral 16-da Ukraina prezidenti Petro Poroşenko dünya toplulığını ilhaq etilgen Qırımda kelecekteki Rusiye prezidenti saylavınıñ neticelerini tanımamağa davet etti.
