Rusiye advokatı Nikolay Polozov, qırımtatar milliy areketi veteranı Veciye Kaşkanıñ ölümi vaqiasını tahqiqattan evelki teşkerüv materialları ile tanışıp olamadı, çünki teşkerüv ğayrıdan başlandı ve mart 26-ğa qadar devam etecek. Bunı o, mart 16-da özüniñ Facebookında yazdı.
Polozov: «Teşkerüv materiallarınen tanış olmaq mumkün olmağanı añlaşıldı. Meger, teşkerüv ğayrıdan başlandı ve mart 26-ğa qadar devam etecek, ondan soñ tahqiqatçı hanım, ğayrıdan, cinaiy işniñ açılması ya da açılmasınıñ red etilmesine dair qarar almaq mecbur olacaq. Tahqiqatçı bu husustaki bildirüv kâğıtını maña Moskvağa poçta ile yolladı, lâkin o, şimdilik kelmedi (Qırımdan Moskvağa mektüpler 2-3 afta kelmek mumkün). Bu sebepten, vaqıt uzatmamaq içün men kopiyanı doğrudan-doğru tahqiqatçınıñ qolundan aldım», – dep yazdı.
Bundan evel Rusiye advokatı Nikolay Polozov, qırımtatar milliy areketi veteranı Veciye Kaşkanıñ elâk oluvı şartlarını mustaqil surette tahqiq eterken, Rusiye Tahqiqat komitetiniñ qırımlı hanımnıñ elâk oluvı vaqiası boyunca işniñ açılmasını red etkenini tayin etti.
Fevralniñ başında Rusiye advokatı Nikolay Polozov, Qırımda 2017 senesinde qırımtatar milliy areketi veteranı Veciye Kaşkanıñ vefatını mustaqil surette tahqiq etmege başlağanını bildirdi. Onıñ aytqanına köre, Veciye Kaşkanıñ ölümi – «onı qanunsız olaraq yaqalağan Rusiye telükesizlik hadimleri tarafından quvetniñ adden aşırı ve ğayrı-mutenasip derecede qullanılmasınıñ neticesidir».
Noyabr 23-te Aqmescitte Rusiye telükesizlik hadimleri bir gruppa qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Olarnı Türkiye vatandaşından «aqsız yerde hususan büyük miqdarda para talap etüv»de qabaatladılar.
Rusiye telükesizlik hadimleri tarafından yapılğan bu yaqalav esnasında qırımtatar milliy areketiniñ veteranı Veciye Kaşka yaramadı, qadın vefat etti.
Ukrainanıñ qıtadaki qısmında bulunğan QMC prokuraturası, qanunsız tintüvler, yaqalanuvlar ve qırımtatar milliy areketiniñ veteranı Veciye Kaşkanıñ ölümi vaqiası boyunca cinaiy işler açtı.
Veciye Kaşka – qırımtatar milliy areketiniñ veteranı. O, 1934 senesinde Aluşta yanında bulunğan Üsküt (şimdi Privetnoye) köyünde doğdı. 1944 senesinde qırımtatar halqı sürgün etilgen soñ Veciye Kaşka qorantasınen Özbekistanda yaşadı. 50-nci yıllarda o, aqayı Bekirnen beraber qırımtatar milliy areketine qoşuldı.
