Jeneva konventsiyasına binaen, ilhaq etilgen territoriyada ötkerilgen saylav qanuniy degil. Böylelikle, dünya toplulığı ilhaq etilgen Qırımdaki Rusiye prezidentiniñ saylavını tanımaycaq. Bunı Rusiye advokatı Nikolay Polozov mart 16-da Qırım.Aqiqat içün bergen izaatta söyledi.
Polozov: «Şimdi Qırımda yapılğan şey, halqara uquqınıñ pek qaba bir bozuluvıdır. Eminim ki, dünya toplulığı ilhaq etilgen territoriyada ötkerilgen saylavnıñ neticelerini tanımaycaq. Rusiye territoriyasındaki saylavnıñ neticeleri, büyük ihtimal ile, tanılacaqlar», – dedi.
Bundan evel qırımtatar milliy areketiniñ faaliyetçisi Nariman Celâl Qırım sakinlerine videomuracaat azırlap, onda, yarımadanıñ sakinleri qomşu Rusiye prezidentiniñ saylavında iştirak etse, «Rusiyege, onıñ kirli ve uquqsız işini devam ettirmek içün litsenziya berecekler», dep bildirdi.
Rusiye prezidentiniñ saylavı 2018 senesi mart 18 kününe – Qırımnıñ Rusiye tarafından ilhaqınıñ yıllığına tayın etildi. Onda sekiz namzet iştirak etecek – Sergey Baburin, Pavel Grudinin, Vladimir Jirinovskiy, Vladimir Putin, Kseniya Sobçak, Maksim Suraykin, Boris Titov ve Grigoriy Yavlinskiy.
Fevral 16-da Ukraina prezidenti Petro Poroşenko dünya toplulığını ilhaq etilgen Qırımda kelecekteki Rusiye prezidenti saylavınıñ neticelerini tanımamağa davet etti.
