Qırımtatar milliy areketiniñ faaliyetçisi Nariman Celâl Qırım sakinlerine videomuracaat azırladı. Onda o, yarımada sakinleriniñ qomşu Rusiye prezidentiniñ saylavında iştirak ete bileceklerini, lâkin böyle etip, «Rusiyege, onıñ kirli ve uquqsız işini devam ettirmek içün litsenziya bereceklerini» bildirdi.
«Eger siz, umumen Qırımda ve ayrıca qırımtatar halqına qarşı yapılğanlarnı doğru ve adaletli saysañız, eger siz repressiyalar, onlarca tintüvler ve tevqifler, adaletsiz mahkemeler ve eziyetlevler, aqlarnıñ sıñırlavları ve adamlarnıñ alıp qaçılmaları, hatırañızğa qarşı vandalizmni aqlı, qanuniy ve adaletli saysañız, eger siz, azatlıqsız yaşamaq ve yalanğa boysunmaqnı normal saysañız, o zaman saylav bölüklerge özüñizni sıqmayıp bara beriñiz. Amma aqılıñızda olsun ki, anda rey bereceksizmi, quşçıqnıñ qoyulacaq yerini saylacaqsızmı, yoqsa bazıları kibi bülletenni mahv eteceksizmi – yapacağıñıznıñ iç bir emiyeti yoq, çünki saylav bölügine kelip, siz artıq Reşat Ametovnıñ qatillerine, Ervin İbragimovnı alıp qaçqanlarna, bir çoq taqipler ve eziyetlernñ icracılarına qol tutacaqsız. Siz olarğa, olarnıñ kirli ve uquqsız işini devam ettirmek içün litsenziyanı bereceksiz», – dedi o.
Rusiye prezidentiniñ saylavı 2018 senesi mart 18 kününe – Qırımnıñ Rusiye tarafından ilhaqınıñ yıllığına tayın etildi. Onda sekiz namzet iştirak etecek – Sergey Baburin, Pavel Grudinin, Vladimir Jirinovskiy, Vladimir Putin, Kseniya Sobçak, Maksim Suraykin, Boris Titov ve Grigoriy Yavlinskiy.
Fevral 16-da Ukraina prezidenti Petro Poroşenko dünya toplulığını ilhaq etilgen Qırımda kelecekteki Rusiye prezidenti saylavınıñ neticelerini tanımamağa davet etti.
