Mart 15-te Birleşken Milletler Teşkilâtınıñ Telükesizlik Şurasında ilhaq etilgen Qırımdaki vaziyet boyunca oturışuvda Büyük Britaniya, Niderland, AQŞ ve diger devletleriniñ vekilleri Rusiyeni, Qırımnı Ukrainanıñ kontroli altına qaytarmğa davet etti ve yarımada Rusiyeniñ kontroli altında qalğance Rusiyege qarşı tatbiq etilgen sanktsiyalarnıñ alıp taşlanmaycağını tasdiqladılar.
Tedbirniñ video yayınlanması Birleşken Milletler Teşkilâtınıñ saytında teşkil etildi.
Büyük Britaniyanıñ BMTdeki vekili, qırımtatar halqı ve diger halqlarnıñ vekillerine qarşı repressiyalar aqqında hatırladı.
O: «İlhaqqa qarşı olğan er bir kişi ekstremizde qabaatlanmaq ve kerçek apis muddeti almaq mumkün. Neticede adamlar yarımadanıñ territoriyasından qaça», – dep, Rusiey tarafından mahküm etilgen Qırım sakinleri Oleg Sentsov, Aleksandr Kolçenko, Ruslan Zeytullayev, Nuri Primov ve digerlerni hatırlattı ve Rusiye akimiyetini, «olarnı deral azat etmege» davet etti.
Büyük Britaniyanıñ BMTdeki vekili: «Biz, ilhaqqa qarşılıq köstermek içün yañı yollar tapmaq kerekmiz. Qırımnıñ ilhaqı, Rusiyeniñ aqılsızca areketleri ile halqara uquqnı bozğanınıñ yalıñız bir misalidir», – dedi.
Niderland vekili, Qırımdaki vaziyetni «yañı norma olaraq qabul etmemeli», ve bu, «halqara uquqnıñ qabul etilmez bozuluvı», dedi.
Ondan ğayrı o, BMTniñ azaları olğan devletlerni, BMT Baş Assambleyasınıñ Qırımda insan aqlarınıñ bozuluvı aqqında er yılllıq qararına qol tutmağa ve yarımadanıñ ilhaqını tanımamağa, Rusiyeni ise Ukrainanıñ topraq bütünligi ve suverenitetine urmet köstermege davet etti.
AQŞ vekili Rusiyeni, Qırımnıñ işğalini ve Donbasstaki silâlı çatışmağa qol tutuvını tohtatmağa davet etti.
AQŞnıñ BMTdeki vekili, Rusiye Qırımnı Ukrainanıñ kontroli altına qaytarmağance ondan sanktsiyalarnıñ alıp taşlanmaycağını tasdiqlap: «Qarar – Rusiyeniñdir. Ukrainada çatışmanı o başladı, ve şimdi o toqtatmaq kerek… Qarar siziñdir», – dedi.
Birleşken Milletler Teşkilâtınıñ Telükesizlik Şurası mart 15-te ilhaq etilgen Qırımdaki vaziyet boyunca oturışuv keçire.
Ukraina tış işleri naziriniñ muavini Olena Zerkal oturışuvda, dört yıllıq zorbalıq kampaniyasınıñ neticesinde yarımadada Qırımnıñ ilhaqına narazılıq bildirgen er bir kişi qurban olmaq mumkün, dep bildirdi.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
