İlhaq etilgen Qırımda qomşu Rusiye prezidenti saylavınıñ ötkerilmesi arfesinde qırımtatar faaliyetçileri Rusiye telükesizlik hadimlerinden, Kremlniñ kontroli altında olğan yarımadanıñ ukümetinden ruhset almadan kütleviy tedbirler öttkerilmesiniñ yasaq olğanına dair tenbilev kâğıtları alalar.
Bunı Qırım.Aqiqatqa siyasetşınas ve qırımtatar faaliyetçisi Lenora Dülber bildirdi.
Faaliyetçi: «Soñki eki kün içinde bunıñ kibi tenbilev kâğıtları bir qaç adamğa taqdim etildi. Olar episi – bir de bir şekilde milliy arekette ya da bir kerelik tedbirlerde iştirak etken qırımtatar faaliyetçileri… Men amelde eminim ki, er kes bunı açıqtan bildirmey. Eminim ki, böyle tenbilevler er yerde yapıla, ve bu endi soñki ay içinde özüni köstergen bir tendentsiyadır. Bunıñ saylav ile alâqası olğanı aşkârdır», – dep qayd ete.
Mart 14, çarşenbe künü, Rusiye telükesizlik hadimleri Suvdağ yanındaki Qapsihor (Morskoye) köyünde qırımtatar faaliyetçisi Rustem Useinovğa, uyğulaştırılmayıp kütleviy tedbirlerni keçirmek yasaq olğanı aqqında tenbilev kâğıtını taqdim etecek ediler. Ondan ğayrı, buña oşağan malümatnı faaliyetçi qadın toplay ve muntazam surette Facebookta derc ete.
Rusiye telükesizlik hadimleri tarafından bu hususta açıq menbalarda berilgen izaatlar yoq.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaq etilgeniniñ yıllığına tayın etildi.
Mart 1-de Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ukümetlerini Qırımda Rusiye saylavınıñ qanuniyligini tanımamağa davet etti.
Qırım Rusiye tarafından ilhaqın etilgen soñ mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalarından dolayı şübheli tanılğan Qırım musulmanlarınıñ evleri ketken sayın daa sıq kütleviy surette tintile.
