Link açıqlığı

Saatnıñ esas haberi

Büyük Britaniya tış işleri naziri Cemilev, Umerov ve Çiygoznen körüşti


Boris Conson
Boris Conson

Mart 14-te Londonda Ukraina halq deputatı, qırımtatar halqınıñ lideri Mustafa Cemilev, Qırımtatar Milliy Meclisi reisiniñ muavinleri İlmi Umerov ve Ahtem Çiygoznıñ Britaniyanıñ tış işleri naziri Boris Conson ile qısqa bir körüşüvleri keçti.

Umerov Qırım.Aqiqatqa: «Boris Conson, Ukrainanıñ problemasını yahşı bilgenini, ve bu çatışmada oña qol tutqanını tasdiqladı. Rusiyeden ise sanktsiyalarnı alıp taşlamaycaqlar, aksine – olarnıñ arttırılmasına qol tutalar. Olar, Sergey Skripal ve onıñ qızınıñ zeerlenmesinden soñ Rusiyege pek açuvlılar. Mustafa ağa böyle yanaşuv içün teşekkür bildirdi ve meraqlandı: «Qıral ailesiniñ şimdiki futbol çempionatına barmağanı, İngiltere taqımınıñ da onı boykot etecegi manasına kelemi?» Buña Conson, «ülkemizde bu sportnı pek seveler ve taqımımız baracaq», dedi», – dep, ikâye etti.

Aynı şu künü Ukraina vekilleri Forin-ofisiniñ İnsan aqları ve demokratiya meseleleri boyunca şubesiniñ mudiri Riçard Conson ile körüştiler.

Umerov: «Biz Qırımnıñ problemaları aqqında, anda cümleden qırımtatarlarğa qarşı yapılğan terror, bu territoriyada qaç tintüv, tevqif, yaqalav, cöreme, öldürüv, ğayıp oluv olğanı aqqında ikâye ettik», – dep, qayd etti.

Ondan ğayrı, Büyük Britaniya parlamentinde «Ukraina dostluğı gruppası»nıñ reisi ve azaları ile körüşüv ve Qırımnıñ Rusiye tarafından ilhaqına bağışlanğan «Qırım vaziyeti: ilhaq etilgeninden dört yıl soñra» tedbiri çerçivesinde vekillerniñ çıqışları yapıldı.

Bundan başqa, Cemilev, Umerov ve Çiygoz Britaniyanıñ BBC devlet cemiyet teleradio yayınlav teşkilâtına intervyü berdiler.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG