Avstriya prezidenti Aleksandr Van der Bellen Ukraina zenaatdaşı Petro Poroşenko ile körüşüvinde, Rusiye tarafından ilhaq etilgen Qırımda «qanuniy saylav» keçemez, dep bildirdi.
Bunı mart 14-te Twitterde Poroşenkonıñ spikeri Svâtoslav Tsegolko bildirdi.
Ukraina devleti başlığınıñ matbuat kâtibi, Poroşenko muzakereler esnasında «Avropanı Moskva tarafından işğal etilgen Qırımda planlaştırılğan saylav ayın-oyunına qarşılıq köstermege davet etti», dep ilâve etti.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.
Martnıñ 1-nde Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti.
