Rusiye Federal telükesizlik hizmeti mart 14-te ilhaq etilgen Qırım ile qıtadaki Ukraina arasındaki sıñırnı keçken vatandaşlarınıñ kontrolini arttırdı. Bunı Qırım.Aqiqat muhbiri bildire.
Telükesizlik hadimleri er bir kişi ile 15-20 daqqa suhbetleşe, maden detektorı ile teşkereler, bagajnı köpekler teşkere.
Rusiye telükesizlik muessiseleriniñ saytında kontrolniñ arttırılması aqqında malümat yoq.
Rusiye prezidenti Vladimir Putin mart 14-te «iş ziyareti» çerçivesinde ilhaq etilgen Qırımğa kelmek istey. Kreml matbuat hizmetiniñ malümatına köre, Putin qurulmaq üzre olğan Keriç köprü ve «Simferopol» ava limanınıñ yañı aerovokzal kompleksini körecek ve Aqyarnı ziyaret etecek.
Keçken sefer Putin Qırımnı 2017 senesiniñ noyabrinde ziyaret etti. O vaqıt o, Yaltadaki Livadiya sarayınıñ territoriyasında Rusiye çarı III Aleksandr eykeliniñ açılışında iştirak etti.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplinka».
