Ukraina tış işleri naziri Pavlo Klimkin Kyivde mart 13-te, Qırımtatar Milliy Meclisi liderleriniñ yılda bir kere ötkerilgen çetel diplomatları ile körüşüvinden evel Rusiye prezidenti vazifesine namzet olğan Kseniya Sobçak ilhaq etilgen Qırım territoriyasına Ukraina qanunlarına muvafıq olaraq kire bilecek, dedi. Bunı Qırım.Aqiqat muhbiri bildire.
Aynı zamanda Klimkin, bu ziyaret Kseniya Sobçakniñ saylav aldı kampaniyasnıñ bir qısmı olmaycağına şüphesini bildirdi.
Qırım.Aqiqat muhbiriniñ sualine cevap bererek, Klimkin: «O, işğal etilgen Qırım territoriyasına kire bile. Elbette, Ukraina qanunlarına muvafıq olaraq. Elbette, anda olğanları ile laf etip. Lâkin (Rusiye prezidenti saylavına – QA) bir afta qalğanda kirip, anda nasıldır adamlarnen laf etip ve bu mediya tarafından aydınlatılğan soñ, bunıñ saylav aldı kampaniyasınıñ bir qısmı olmağanını söylemek – bu, eñ azından, hucurdır. Bu sebepten, iç bir şahsiy itirazım olmasa bile, siyasiy munaqaşanı devam etecekmiz», – dedi.
Martnıñ 6-sında «Vatandaşlar teşebbüsi» fırqasından Rusiye prezidenti vazifesine namzet olğan Kseniya Sobçak Rusiyede Ukrainanıñ elçiligine, Qırımğa Ukraina territoriyasından kirmege izin sorap, mektüp yollağanını bildirdi.
Ukraina İnformatsion siyaset nazirliginde, Sobçak ilhaq etilgen Qırımğa Ukrainanıñ qıtadaki territoriyası tarafından munasip teşkerüvlerden soñ bara bilecegini bildirdiler.
2017 senesi oktâbrniñ 18-nde Kseniya Sobçak qomşu Rusiyedeki prezident saylavında iştirak etmek istegenini resmen bildirdi. O, özüne «er keske qarşı» namzet, dey. Sobçak, ilhaq etilgen Qırımda saylav aldı teşviqat kampaniyasını yapmaycağını bildirdi.
Sobçaknıñ fikrine köre, Kyiv ile Moskva birlikte ilhaq etilgen Qırımnıñ statusına dair referendumnı ötkermek kerekler.
