Ukraina prezidenti Petro Poroşenko, Ukraina ukümetiniñ ilhaq etilgen Qırımda Rusiye prezidenti saylavını tanımaycağını ve onıñ teşkilâtçılarına qarşı sanktsiyalar tatbiq etecegini beyan etti.
Bunı Poroşenko Twitterdeki saifesinde, Avropa komissiyası vitse-prezdenti Federika Mogerini ile muzakereleriniñ neticelerini iza eterken bildirdi.
Ukraina devletiniñ başlığı: «Kelecek bazar künü ötkerilecek Rusiye prezidenti «saylavı» munasebeti ile men, Ukrainanıñ, vaqtınca işğal etilgen territoriyalarda sahte prezident saylavını tanımaycağını ve saylav ceryanını teşkil etken şahıslarğa qarşı sanktsiyalar tatbiq etecegini açıqtan söyledim», – dep yazdı.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaq etilgeniniñ yıllığına tayin etildi
Mart 1-de Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
