Prezidentniñ Qırım Muhtar Cumhuriyetindeki daimiy temsilcisi Boris Babin, Rusiye prezidentiniñ saylavı ötkerilgen soñ Qırımnıñ Rusiye ükümeti yarımadanıñ bütün sakinlerine qarşı repressiyalarnı arttıracaq, dep tüşüne.
Martnıñ 7-sinde «5-nci kanal»nıñ efirinde Babin: «Bizde, teessüf ki, sözde «saylav»dan soñ repressiyalarnıñ bayağı büyük bir yañı dalğası olacağına dair malümat bar. Ve artıq anda yaşap, tazyiq altında bulunğan tamır qaırımtatar halqına qarşı degil. Umumen ealiniñ bütün kategoriyalarına qarşı. Çünki olar qol tutuvnıñ aqiqiy neticelerini körecek, ve endi, belki de, qorquzuv ve tazyiqqa dair munasip buyruqlar bar. Ve, teessüv ki, biz daa beter, Şimaliy Kavkazdakine oşağan adiselerni bekleymiz», – dedi.
Onıñ malümatına köre, şimdi «cezalamaq, öldürmek, eziyetlemek, zorlamaq ne olğanı bilingen» bölgelerden FSB hadimlerini Qırımğa avuştıralar.
Babin: «Biz buña munasip olğan (Qırımdaki repressiyalarğa – QA) qarşılıq kösterilmesiniñ havsızlığı meselelerini, munasip halqara yanaşuvını azırlamaq kerekmiz», – dedi.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.
Ukraina prezidenti Petro Poroşenko dünya toplulığını ilhaq etilgen Qırımda Rusiye prezidentiniñ kelecekteki saylavı neticelerini tanımamağa davet etti.
Martnıñ 1-nde Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
