Rusiye prezidenti vazifesine namzet olğan Kseniya Sobçak, Rusiyedeki Ukraina elçiliginiñ, siyasetçiden qıtadaki Ukraina tarafından Qırımnı ziyaret etmek ricası ile arizanı almağanı aqqında malümatqa «yalan», dedi.
Sobçak, Сибирь.Реалии neşiri içün bergen intervyüde: «Men, Ukraina ukümetinden Ukraina toprağından Qırımğa kirmek içün izin sorağan yekâne Rusiye siyasetçisi olam. Ukrainanıñ Rusiyedeki elçiliginiñ vekilleri, bu arizanıñ kopiyasını almağanlarını aytalar, bu yalandır», – dedi.
Ukraina diplomatları tarafından bu hususta açıq menbalarda şimdilik izaat berilmedi.
Bunıñ arfesinde Ukrainanıñ Rusiyedeki elçiligi «İnterfaks.Ukraina»ğa, Rusiye prezidenti vazifesine namzet olağan Kseniya Sobçaktan, qıtadaki Ukraina tarafından keçip ilhaq etilgen Qırımnı ziyaret etmek imkânıñ berilmesi aqqında arizanı almağanını bildirdi.
Martnıñ 6-sında «Vatandaşlar teşebbüsi» fırqasından Rusiye prezidenti vazifesine namzet olğan Kseniya Sobçak Rusiyede Ukrainanıñ elçiligine, Qırımğa Ukraina territoriyasından kirmege izin sorap, mektüp yollağanını bildirdi.
Ukraina İnformatsion siyaset nazirliginde, Sobçak ilhaq etilgen Qırımğa Ukrainanıñ qıtadaki territoriyası tarafından munasip teşkerüvlerden soñ bara bilecegini bildirdiler.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.
Ukraina prezidenti Petro Poroşenko dünya toplulığını ilhaq etilgen Qırımda Rusiye prezidentiniñ kelecekteki saylavı neticelerini tanımamağa davet etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
