Qırımtatar Milliy Meclisiniñ reisi Refat Çubarov, Qırım sakinleri, Kreml tarafından Qırımda martnıñ 18-nde ötkerilmesi planlaştırılğan Rusiye prezidenti saylavında iştirak etmeseler, Rusiye qanunlarına binaen mesuliyetke çekilmeycekler, dep bildirdi.
Martnıñ 8-nde «5-nci kanal»nıñ efirinde Çubarov: «Biz (Qırımdaki – QA) er bir kişige irişmek isteymiz. İşğal etilgen Qırımda da cariy olğan ameldeki Rusiye qanunlarınıñ variantında, insanlarnıñ saylav bölüklerine kelmegenleri içün mesuliyet aqqında madde yoq. Memuriy taqip de közde tutulmay. Yani şimdi yapılğan tazyıq, ahlâqiy-psihologik harakterge maliktir. Amma añlaşıla ki, bazı işhanelerde muayen neticeler de olmaq mumkün. Misal içün, işten çıqaruvlar…», – dedi.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.
Ukraina prezidenti Petro Poroşenko dünya toplulığını ilhaq etilgen Qırımda Rusiye prezidentiniñ kelecekteki saylavı neticelerini tanımamağa davet etti.
Martnıñ 1-nde Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
