Ukraina tış işleri naziriniñ Avropağa integratsiya meseleleri boyunca muavini Olena Zerkal, ilhaq etilgen Qırımda Rusiye saylavınıñ ötkerilmesine alâqası olğanlarnıñ episini sanktsiyalar rejimi bekley, dep bildire.
Martnıñ 7-sinde «5-nci kanal»nıñ efirinde, yarımadanıñ sakinlerine qarşı, martnıñ 18-nde saylav bölüklerine barğanları içün sanktsiyalar qullanılacaqmı, degen sualine cevap berip: «Ealiniñ böyle bir qısmına qarşı sanktsiyalarnı qullanmaq problemalı olacaq. Vastasız surette saylav ceryanında iştirak etkenler, saylav komissiyalarınıñ azalarına kelgende ise – bu, sanktsiyalar rejimi olacaq», – dedi.
Zerkal, bir de bir adamnıñ Qırımda saylav bölügine barğanını közetip tayin etmek içün vastalar yoq, dep añlattı.
«Biz şimdi endi bütün bu adamlar spektrni – kollaborantlar olğan, saylav komissiyalarında iştirak etken, saylavnıñ ötkerilmesine yardım etkenlerni tayin etemiz, ve Devlet Duması saylavına nasıl qarşılıq köstergen olsaq, şimdi de böyle qarşılıq kösterecekmiz», – dedi Zerkal.
O, 2016 senesi sentâbrniñ 18-nde Qırımda Rusiye Devlet Duması deputatlarınıñ saylavı keçken soñ, o zaman «bizim litvalılar ile añlaşmamız tesir etip, olar bütün bu adamlarnı sanktsiyalar cedveline kirsettiler, dep qayd etti.
Zerkal: «Ve Litvanıñ sanktsiyalar cedveli amelde bütün Şengen zonası içün qullanıla», – dep ilâve etti.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.
Ukraina prezidenti Petro Poroşenko dünya toplulığını ilhaq etilgen Qırımda Rusiye prezidentiniñ kelecekteki saylavı neticelerini tanımamağa davet etti.
Martnıñ 1-nde Yuqarı Rada BMT Telükesizlik Şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti<.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
