İlhaq etilgen Qırımnıñ sakinleri qumşu Rusiyesınıñ prezidenti saylavına öz adlarına yazılğan davetnamelerni alıp başladılar. Bunı martnıñ 7-sinde Qırım.Aqiqat muhbiri bildire.
Davetnamede saylav bölügi aqqında malümattan ğayrı yaşağan yeri tışında nasıl etip rey bermek mumkün olğanı aqqında qoşumça malümat berile.
İnsan aqları boyunca Qırım alâqa gruppasınıñ koordinatorı Abdureşit Cepparov: «Faaliyetçiler, Qırımda pek çok kelmeşek, şu cümleden slavân körünişli olğanlarnıñ körülgenini qayd eteler. Büyük ihtimal ile yaşağan yeri tışında rey bergenler çoq olacaq. Bu ise ükümetke daa yüksek iştirak seviyesini köstermege yardım etecek», – dep iza etti.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.
Daa evel Ukraina prezidenti Petro Poroşenko dünya toplulığını ilhaq etilgen Qırımda Rusiye prezidentiniñ kelecekteki saylavı neticelerini tanımamağa davet etti.
Martnıñ 1-nde Yuqarı Rada BMT Telükesizlik şurası ve Baş assambleyası, Avropa Birligi, NATO, halqara teşkilâtlar, çetel parlamentleri ve ukümetlerini Qırımda Rusiye saylavınıñ qanuniyligini tanımamağa davet etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
