Kremlniñ kontroli altında olğan Qırım Yuqarı mahkemesi Aqmescitteki «Hizb ut-Tahrir işi» figurantları tarafından tevqif muddetleriniñ uzatılmasına qarşı bergen apellâtsion şikâyetleri boyunca menfiy qarar aldı. Bunı Qırım.Aqiqatqa qabaatlanğanlardan birisi Uzeir Abdullayevniñ advokatı Sergey Legostov söyledi.
Legostov: «Yalıñız Uzeir Abdullayev aqqında ayta bilem – oña uzattılar ve qalğanlarğa da büyük ihtimal ile uzattılar. Olar apiste aprelniñ 11-ne qadar qalacaqlar», – dedi.
Qabatlanğanlarnıñ daa birisi, Emil Cemadenovnıñ advokatı Edem Semedlâyev de, «Qırım birdemligi» faaliyetçileri tarafından derc etilgen videomuracaatta, apellâtsiya boyunca menfiy qarar alındı, dedi.
Martnıñ 6-sında Aqmescitteki «Hizb ut-Tahrir işi» boyunca oturışuv qapalı rejimde keçe edi. İş figurantlarınıñ aqrabaları ve dostları bu sebepten şikâyetler yaza ediler.
Fevralniñ başında Rusiye mahkemesi Aqmescitteki «Hizb ut-Tahrir işi» figurantları Teymur Abdullayev, Uzeir Abdullayev, Ayder Saledinov, Rustem İsmailov ve Emil Cemadenovnı aprelniñ başına qadar apiste qaldırdı.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarınıñ qullanıluvını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni «terroristik» olaraq tanılğan 15 birleşmeniñ cedveline kirsetip, yasaq etti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetine köre yapılğanını tüşüneler. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd ete. Halqara uquq, işğal etilgen territoriyada işğal etken devletniñ qanunlarını tatbiq etmekni yasaq ete.
