Rusiyeniñ «Pervıy kanal»ı devlet prezidentiniñ saylavından evelki sükünet künü, martnıñ 17-sinde rejissör Aleksey Pimanovnıñ «Krım» bediiy filmini kösterecek, dep bildire TASS.
Agentlik: «Filmde, 2014 senesiniñ baarinde Qırımda olıp keçken kerçek vaqialarğa esaslanğan bir çoq epizod bar. Filmni meydanğa ketirgenlerniñ esas maqsatlarından biri, Rusiye ve Ukraina halqlarına soñ derecede urmet kösterip, Rusiye, Ukraina ve zaten bütün dünyadaki seyircilerge Qırım, Rusiye ve Ukraina sakinleriniñ o künlerde başından keçirmege mecbur olğanlarını añlamağa yardım etmek edi», – dep, telekanal matbuat hizmetiniñ bildirüvini naqil ete.
Rusiyede «Krım» filminiñ premyerası 2017 senesi sentâbrniñ 28-nde keçti. Filmniñ yaratıcıları, onıñ 2014 senesinde yarımadanıñ Rusiye tarafından ilhaqı fonunda «sevgi, işanç ve şeref, ruh quveti ve kerçek dostluq ikâyesini» köstergenini, tüşüneler. Rusiye kinematografiyası içün bu, propaganda noqtai-nazarından muim olğan tarihiy vaqialar motivleri esasında tam metrli bediiy film çıqarılmasınıñ birinci tecribesi degildir.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.
Daa evel Ukraina prezidenti Petro Poroşenko dünya toplulığını ilhaq etilgen Qırımda Rusiye prezidentiniñ kelecekteki saylavı neticelerini tanımamağa davet etti.
Martnıñ 1-nde Yuqarı Rada BMT Telükesizlik şurası ve Baş assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
