Ukrainanıñ vaqtınca işğal etilgen territoriyaları boyunca nazirligi Qırım sakinlerini yarımadanıñ territoriyasında Rusiye prezidentinñ qanunsız saylavında iştirak etmemege, qanunsız saylavğa qol tutmamağa ve Qırımda prezident saylavında iştirak etüv boyunca er anği adımlardan vazgeçmege davet ete. Bu hususta martnıñ 6-sında muessiseniñ saytındaki beyanatta aytıla
Beyanatta: «İşğalci devlet tarafından Qırım MCde saylavnıñ ötkerilmesi Ukraina Anayasası ve qanunları, halqara uquq printsipleri ve normaları, Birleşken Milletler Teşkilâtınıñ 1945 senesi iyün 26 tarihlı Nizamnamesi, 1975 senesi ağustos 1 tarihlı Helsinki yekünleyici aktı, 1994 senesi dekabr 5 tarihlı Budapeşt memorandumı, BMT Baş Assambleyasınıñ 2016 senesi dekabr 9 tarihlı A/RES/71/205 «Qırım Muhtar Cumhuriyeti ve Aqyar şeerinde insan aqları saasındaki vaziyet» ve Baş Assambleyasınıñ 2014 senesi mart 27 tarihlı 68/262 nomeralı «Ukrainanıñ topraq bütünligi» qararları ve diger halqara uquqiy aktlarınıñ qaba surette bozuluvdır», – denile.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.
Daa evel Ukraina prezidenti Petro Poroşenko dünya toplulığını ilhaq etilgen Qırımda Rusiye prezidentiniñ kelecekteki saylavı neticelerini tanımamağa davet etti.
Martnıñ 1-nde Yuqarı Rada BMT Telükesizlik şurası ve Baş Assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
