Qırım sakinleri ilhaq etilgen Qırımdaki Rusiye saylavında rey bergenleri içün qanun boyunca cezalanmaycaq olsalar da, yarımadada saylavnıñ teşkil etilmesine alâqadar olğanlarnı cinaiy cevapkârlıq bekley. Bunı Qırım.Aqiqat Radiosı efirinde Ukraina Saylavcılar komitetiniñ başlığı Aleksey Koşel bildirdi.
Cemiyetçi: «Rusiye prezidenti saylavına rey bermek içün barğan Qırım sakinleri bunıñ içün uquqiy mesuliyetke çekilmeyip, yalıñız ahlâqiy mesuliyetke çekile bilirler. Faqat saylavnıñ teşkil etilmesinde iştirak etkenler: saylav bölükleri, territorial komissiyaları, sözde Qırım ve Aqyar saylav komitetleriniñ azaları –Ukraina Cinaiy kodeksiniñ devletke hiyanet aqqında maddesi boyunca iç şübhesiz mesuliyetke çekilmelidirler», – dep qayd etti.
Daa evel QMC prokuraturası Qırım sakinlerini ilhaq etilgen Qırımda qomşu Rusiye prezidenti saylavınıñ teşkil etilmesinde iştirak etmemege davet etti.
QMC prokuraturası, ilhaq etilgen Qırımda Rusiye saylavını teşkil etken saylav komissiyalarınıñ 10 biñ azasını mesuliyetke çekmek mumkün.
Rusiye prezidenti saylavınıñ ötkerilmesi 2018 senesi mart 18-ne – Qırımnıñ Rusiye tarafından ilhaqınıñ yıllığına tayın etildi.
Ukraina prezidenti Petro Poroşenko dünya toplulığını ilhaq etilgen Qırımda Rusiye prezidentiniñ kelecekteki saylavı neticelerini tanımamağa davet etti.
Martnıñ 1-nde Yuqarı Rada BMT Telükesizlik şurası ve Baş assambleyası, Avropa Birligi, NATO, halqara teşkilâtlar, çetel parlamentleri ve ükümetlerini Qırımda Rusiye saylavınıñ qanuniyligini tanımamağa davet etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevral 20 kününi, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
