Kremlniñ kontroli altında olğan Aqmescitteki Jeleznodorojnıy rayonı mahkemesi, Han sarayınıñ «rekonstruktiya»sını toqtatmaq talabı ile davanıñ açılması boyunca muracaatnı red etti. Bunı Qırım.Aqiqatqa martnıñ 5-nde Rusiye advokatı Nikolay Polozov bildirdi.
Polozov: «Bugün (martnıñ 5-nde – QA) mahkemeden, davanıñ açılması içün berilgen arizanıñ red etilmesi aqqında tarifleme ile cevap keldi. Sanki OOO «Kiramet» şirketiniñ areketleri iç bir şekilde aqlar ve urriyetlerge, ve bunıñ kibi de menim muvekkilim (Bağçasaray tarih ve medeniyet qoruğınıñ sabıq yolbaşçısı Elmira Ablâlimovanıñ – QA) menfaatlarına toqunmaylar. Maña köre, bu mesaj, mutlaq bir arsızlıqtır: Han Camisi qırımtatar saray mimarlığınıñ yekâne örnegidir, Ablâlimova ise qırımtatardır. Buña baqmadan, Rusiye mahkemesi öz milliy variyetini qanuniy usulnen qorçalamaq aqqını red etti», – dedi.
Advokatnıñ aytqanına köre, o, Kremlniñ kontroli altında olğan Qırımnıñ Yuqarı mahkemesine bu tariflemege qarşı şikâyet bermek istey.
Fevralniñ 16-sında Aqmescitteki Jeleznodorojnıy rayonı mahkemesine Han sarayında «rekonstruktsiya»nı toqtatmaq talabı ile davanıñ açılması boyunca ariza berildi.
Polozov, arizanı bergen şahısnıñ Bağçasaray tarih ve medeniyet qoruğınıñ sabıq yolbaşçısı Elmira Ablâlimova ve özüniñ onıñ vekili olğanını bildirdi.
«Kiramet» şirketi tarafından bu hususta açıq menbalarda izaat berilmedi.
Fevralniñ 16-sında Meclis reisi Refat Çubarov Kyivde keçken Dünya qırımtatarları kongressi icra komitetiniñ oturışuvında, Bağçasaraydaki Han sarayınıñ «rekonstruktsiya»sı neticesinde bazı obyektlerniñ endi eñ başındaki körünişlerini ğayıp etkenlerini bildirdi.
Bundan evel QMC milletlerara munasebetler ve sürgün etilgen vatandaşlarnıñ işleri boyunca komitetiniñ sabıq yolbaşçısı, Qırım faaliyetçisi Edem Dudakov, «rekonstruktsiya» neticesinde Bağçasaraydaki Han sarayından alıpnğan kiramet ve ağaç kerişler diger bir mimarlıq abidesi – Zıncırlı medreseniñ territoriyasında tapıldılar, dep bildirdi.
Faaliyetçiniñ malümatına köre, «rekonstruktsiya» esnasında Han sarayınıñ ağaç kerişleri mahv etildi. Olarnıñ bir qısmı pıçıldı ve daa bir qısmı alıp ketildi. Ondan ğayrı, Dudakovnıñ malümatına köre, restavratsiyanı yapqan «Atta-grup» podrâdçı şirketi qadimiy kirametni, İspaniyada eski tarzğa oşatılıp yasalğan yañısına deñiştirmek planlaştıra.
Ukraina Medeniyet nazirligi, Qırımnıñ Rusiye ukümeti tarafından Bağçasaray qoruğu territoriyasında işlerniñ yapılması neticesinde Han sarayınıñ baş binası içün mahv etilmek telükesi bar, dep iddia ete.
2016 senesiniñ iyülinde Rusiyeniñ kontroli altında olğan Qırım ukümeti yanındaki Medeniy mirasnı qoruv boyunca devlet konitetiniñ ilmiy-usuliy şurası yarımadanıñ bir qaç tarihiy obyektinde ve şu cümleden Bağçasaraydaki Han sarayında qazalarğa qarşı ilk nevbetteki işlerniñ yapılması boyunca bir fikirge keldi.
Bağçasaraydaki Hansaray muzeyi – qırımtatarlarnıñ tarihı ile alâqalı olğan eñ belli muzey, qırımlı Girey hanlarınıñ yazlıq rezidentsiya yeridir. Muzey kompleskiniñ territoriyasında saray, harem binası, han mezarlığı ve cami bulunalar.
