Bağçaraydaki Hansarayda yapılğan «rekonstruktsiya» denilgen işler neticesinde toplanğan kiramet ve tavanağaçlar, şeer rayonlarınıñ diger mimariy abidesi olğan Zıncırlı medrese territoriyasında tapılğan. Bu aqta özüniñ Facebook saifesinde Qırım MC milletlerara munasebetler ve sürgün etilgen vatandaşlar komitetiniñ sabıq reberi, qırımlı faal Edem Dudakov haber etmekte.
«Hansaraynıñ yañı mezarlığını istegen er kes, Zıncırlı medrese territoriyasında problemsizziyaret etebile. Kiriş serbest. Artefakt yadikârlıqları – bedava. İmkân olğanda bir zamanlarda mühteşem olğan abidege temenna etiñiz. Atta hatıra fotosureti de çektire bilesiñiz. Torunlarıñız artıq kerçek tarihni körip olamaz. Olarğa butoforiya pişirerler», – dep yaza Dudakov.
Faalniñ malümatına köre, «rekonstruktsiya» vaqtında Hansaraynıñ tavanağaçları yoq etilgen edi: bir qısmı pıçıldı, diger qısmı alıp ketildi. Ondan da ğayrı, Dudakovnıñ malümatına köre, rekonstruktsiya keçirgen «Atta-grupp» tış icracı-şirketi eski kiramet yerine ispanya kirameti qullanmaq istey.
Ukraina Medeniyet nazirligi, Qırımnıñ Rusiye akimiyeti tarafından Bağçasaray qoruğınıñ territoriyasında yapılğan işler neticesinde Hansarayınıñ baş binası içün dağıluv telükesi bar, dep iddia ete.
2016 senesi iyül ayında Rusiye nezaretindeki Qırım ükümetiniñ medeniy miras imayesi Devlet komitetiniñ ilmiy-metodik şurası, yarımadanıñ bir qaç tarihiy obyektleri arasından Bağçasaraydaki Hansarayda qazağa qarşı ilk nevbetteki işlerniñ keçirilüvini tasdıqlağan edi.
Bağçasaraydaki Hansaray muzeyi – qırımtatarlarnıñ tarihı ile alâqalı olğan eñ belli muzey, Qırımnıñ Girey hanlarınıñ yazlıq rezidentiyası yeri. Muzey kompleskiniñ territoriyasında saray, harem binası, han mezarlığı ve cami bulunalar.
