Rusiye tarafından ilhaq etilgen Qırımda zemaneviy silâ sistemalarınıñ ve şu cümleden S-400 «Triumf» ava mudafaası zenit-raketa kompleksleriniñ yerleştirilmesi Qırımda işğal rejiminiñ yoq etilmesi ceryanına keder etmez.
Bunı martnıñ 4-nde 112-nci kanalnıñ efirinde Meclis yolbaşçısı Refat Çubarov bildirdi.
Çubarov: «Aqiqaten, rusiyeliler yarımadağa, bugün qollarında olğan bütün zemaneviy silâlarını ketirip toldurdılar. Olarnıñ zenit-raketa sistemaları NATO azaları olğan devletler – Bulğaristan, Romaniya ve Türkiyege zarar ketirmek mumkünler. Lâkin Qırım deokkupatsiyası kontekstinde bu, aşılmaz manialar doğura, dep iddia etmez edim», – dedi.
Meclis yolbaşçısınıñ aytqanına köre, Ukrainanıñ halqara ortaqları bütün yönelişlerde ve şu cümleden iqtisadiy sanktsiyalar vastasınen Rusiyege faal surette tazyıq eteler.
Ukrainada NATO ofisi mudiriniñ muavini Ann-Kristin Bergene, Qırımnıñ arbiyleştirilmesi ve Qara deñiz bölgesinde Rusiye arbiy mevcudiyetiniñ kenişletilmesi munasebeti ile endişeni bildirdi.
2018 senesiniñ başında Rusiye arbiyleri Aqyardaki Fiolent burnu etrafşarında S-400 «Triumf» zenit-raketa kompleksleriniñ ekinci divizionını yerleştirdiler. Jurnalistlerge, raketa sisteması Qırımnıñ qıtadaki Ukraina ile memuriy sıñırı keçken Çoñğar ve Ermeni Bazar (Armânsk) üstündeki kökni kontrol etecek, dep añlattılar.
