Qırım Muhtar Cumhuriyeti Prokuraturası Ukraina vatandaşlarına, ilhaq etilgen Qırımda Rusiye saylavınıñ ötkerilmesinde iştirak etmeleri taqdirinde olarnı Ukraina Cinaiy kodeksiniñ «devletke hiyanet» maddesi boyunca cezalav beklegenini bildire.
Bunı «Qırım.Aqiqat TV» içün bergen izaatta QMC prokurorınıñ muavini Aleksandr Udoviçenko söyledi.
Udoviçenko: «Bu, Ukraina vatandaşı olsa, qabaatı isbatlanğan taqdirde oña, 15 yılğace azatlıqtan marum etüvni közde tutqan devletke hiyanet ve Cinaiy kodeksinde aynı bunıñ kibi cinayet olaraq belgilengen qanunsız olaraq saylavnıñ keçirilmesi içün cezalavlar tayin etile bile», – dep bildirdi.
Prokuraturada, yarımadada saylavnıñ teşkil etilmesi ve keçirilmesinde iştirak etken Rusiye vatandaşları, Ukraina Cinaiy kodeksiniñ devlette akimiyetni zapt etüv ve Ukrainanıñ topraq bütünligine qarşı areket etüv aqqında maddeleri boyunca taqip etile bileler, dep qayd ettler.
Daa evel QMC prokuraturası Qırım sakinlerini ilhaq etilgen Qırımda qomşu Rusiye prezidenti saylavınıñ teşkil etilmesinde iştirak etmemege davet etti.
QMC prokuraturası, ilhaq etilgen Qırımda Rusiye saylavını teşkil etken saylav komissiyalarınıñ 10 biñ azalarını mesuliyetke çekmek mumkün.
Rusiye prezidentiniñ saylavı 2018 senesi mart 18 kününe – Qırımnıñ Rusiye tarafından ilhaqınıñ yıllığına tayın etildi.
Ukraina prezidenti Petro Poroşenko dünya toplulığını ilhaq etilgen Qırımda Rusiye prezidentiniñ kelecekteki saylavı neticelerini tanımamağa davet etti.
Martnıñ 1-nde Yuqarı Rada BMT Telükesizlik şurası ve Baş assambleyası, Avropa Birligi, NATO, halqara teşkilâtlar, çetel parlamentleri ve ükümetlerini ilhaq etilgen Qırım territoriyasında keçirilmesi taqdirde Rusiye prezidenti saylavlarınıñ qanuniyligini tanımamağa davet etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
