Rusiye ukümeti, Qara deñiz bölgesinde üstünlikni qazanmaq içün ilhaq etilgen Qırımda öz Silâlı quvetleriniñ hadimlerini, silâlarını ve tehnikasını yerleştire. Bunı Qırım.Aqiqat Radiosı içün bergen intervyüde arbiy ekspert, Ukraina Silâlı quvetleri ştabınıñ sabıq spikeri Vladislav Seleznöv söyledi.
Onıñ aytqanına köre, al-azırda Rusiye, Qırımda bulunğan arbiy tehnikanıñ yardımınen cümleden Qara deñiz bölgesindeki devletler içün de telüke doğura bile.
«Fiolent burnunda nevbetteki ava mudafaası divizionınıñ işke tüşürilmesi, Qırımnı batırılmaz uçaq taşıyıcısına çevirüv yani Qara deñiz bölgesinde üstünlikniñ temin etilmesine doğrultılğan küçlü arbiy gruppirovkanı meydanğa ketirüv strategiyasına tolusınen uymaqta», – dedi Seleznöv.
Bu hususta daa tafsilâtlı malümat – yaqın künlerde Qırım.Aqiqat saytında derc etilecek intervyüdedir.
Fevralniñ ortasında Qara deñiz suvlarına Amerikanıñ «Karni» esminetsi kirdi. AQŞ Arbiy-deñiz quvetlerindeki 6-ncı flotnıñ matbuat hizmetinde esminetsniñ kelüvini, havsızlıq içün zarur olğan operatsiyalarnı yapmaq kerekligi ile añlattılar.
Fevralniñ 28-nde Ukrainada NATO ofisi mudiriniñ muavini Ann-Kristin Bergene, Qırımnıñ arbiyleştirilmesi ve Qara deñiz bölgesinde Rusiye arbiy mevcudiyetiniñ kenişletilmesi munasebeti ile endişelengenini bildirdi.
