Ukraina pasportlarını saqlap qalğan genç Qırım sakinleri yarımadada Rusiye ordusına çağırılmamaq içün mahkemege muracaat ete bileler. Bunı Qırım.Aqiqat Radiosı efirinde Rusiye prezidenti yanındaki İnsan aqları boyunca şurasınıñ arbiy hadimlerniñ aqları boyunca daimiy komissiyanıñ rehberi ve «Vatandaş ve ordu» areketiniñ koordinatorı Sergey Krivenko söyledi.
Aq-uquq qorçalayıcısı: «Rusiye ordusına yalıñız Rusiye vatandaşları çağırıla. Bir genç Ukraina vatandaşı olıp qalsa ve Rusiye pasportını almağan olsa, onı qanun boyunca askerlikke çağırmaq mumkün degil. Qırımda insanlarğa Rusiye vatandaşlığı avtomatik surette berildi. Aks-alda red etüv protsedurasını keçmek kerek edi. Böylelikle, genç bu protseduranı keçip yetiştiremedi, o, Ukraina vatandaşı olıp qala, dep mahkemege ariza ile muracaat etmek mumkün, ve bu taqdirde onı qanun boyunca askerlikke çağırmaq mumkün olmaycaq. Amma eki pasportı olsa, onı askerlikke çağırılması şart olğan Rusiye vatandaşı sayacaqlar», – dep qayd etti.
Daa evel «Qırım birdemligi» birleşmesiniñ oturışuvında Qırım adliyecisi Lilâ Gemeci, Rusiye ordusına çağırılğan Qırım gençlerini Ukraina vatandaşlığından vazgeçmege davet etkenlerini bildirdi. Onıñ aytqanına köre, vatandaşlar endi bu munasebet ile aq-uquq qorçalayıcılarına muracaat eteler.
Qırım aq-uquq qorçalayıcıları gruppasınıñ malümatına köre, üç yıl zarfında Rusiye ordusına 10 biñge yaqın Qırım sakini çağırıldı. 2018 senesiniñ yanvarinde Qırım Muhtar Cumhuriyeti prokuraturası Qırım sakinlerini, Rusiye ordusında hizmet etmek içün povestka alsalar, telefon ya da elektron poçta vastasınen muracaat etmege rica etti.
