Qırımda qomşu Rusiyeniñ prezidenti saylavına davetnamelerni poçta qutularına dağıtıp başladılar. Bunı martnıñ 3-nde Qırım.Aqiqat muhbiri bildire.
Muhbirniñ aytqanına köre, davetnameler keyfiyetli bir cilâlı kâğıtta poçta kartı şeklinde Rusiye Merkeziy saylav komissiyasınıñ reisi Ella Pamfilovanıñ imzası ile bastırıldı.
İnsan aqları boyunca Qırım alâqa gruppasınıñ koordinatorı Abdureşit Cepparov: «Qırımda saylav aldı kampaniyası surat alıp ilerley. Amma onda saylavcılarnıñ kelmesine esas diqqat ayırıla. Yerli akimiyetniñ bundan endişelengeni duyula. O, qırımtatarlarnıñ saylavğa barmaycaqlarını bile. Rey berüvde iştirak etmek istemegen slavânlar da çoq. Mayıs 18-de rey berüvde iştirak etmek kerekliginiñ israr ile yapılğan propagandasınıñ sebebi budır», – dep, vaziyetni izaladı.
Martnıñ 1-nde Aqyarda Nahimov rayonınıñ 80 yıllığına bağışlanğan bayram tedbirinde sovetler devri muzıkasını diñledi ve qomşu Rusiyeniñ prezidenti saylavında iştirak etmege davet ete ediler.
Rusiye prezidentiniñ saylavı 2018 senesi mart 18 kününe – Qırımnıñ Rusiye tarafından ilhaqınıñ yıllığına tayın etildi.
Ukraina prezidenti Petro Poroşenko dünya toplulığını ilhaq etilgen Qırımda Rusiye prezidentiniñ kelecekteki saylavı neticelerini tanımamağa davet etti.
Martnıñ 1-nde Yuqarı Rada BMT Telükesizlik şurası ve Baş assambleyası, Avropa Birligi, NATO, halqara teşkilâtlar, çetel parlamentler ve ükümetlerini ilhaq etilgen Qırım territoriyasında keçirilmesi taqdirde Rusiye prezidenti saylavlarını qanuniy olaraq tanımamağa davet etti.
