Vaqtınca işğal etilgen Qırım ve Aqyarda Rusiye prezidenti saylavına qanunsız olaraq azırlıq yapılması munasebeti ile Ukraina Yuqarı Radasınıñ dünya toplulığına muracaatı aqqında qarar, NATO Parlament assambleyası prezidenti Paolo Ali ve bütün azalarına deral yollanacaq.
Bunı martnıñ 1-nde Ukraina deputatı, NATO Parlament assambleyasındaki daimiy eyetniñ reisi İrina Friz Facebookta bildirdi.
Friz: «Martnıñ 18-nde Qırımda, bir vaqıt ötkerilgen sahte referendum kibi, saylavsız saylav keçecek. Eminim ki, Kreml tarafından Qırım yarımadasınıñ territoriyasında sahnalaştırılğan «saylav ayin-oyunı», aq-uquq ve urriyetlerniñ bozuluvları, konservatsiya etilgen nükleer anbarlarnıñ ğayrıdan işletüv içün açılması ve qoşumça arbiy quvetlerniñ yerleştirilmesine dünyada sert bir qıymet kesilmeli ve bu areketler taqbih etilmelidir. Parlament tarafından yapılğan muracaatnıñ tercimesini, Alyansnıñ Parlament assambleyası azalarınıñ haberdar etilmesi boyunca muracaatnen beraber, NATO Parlament assambleyasınıñ prezidenti Paolo Ali adına yollaymız», – dep yazdı.
Halq deputatınıñ aytqanına köre, Qırımdaki Rusiye akimiyetiniñ saylav kününden soñ nevbetteki adımı, yarımadada Rusiye prezidenti saylavında namzet Vladimir Putinge 99 faizniñ qol tutqanı aqqında beyanatı olacaq.
«Demokratiyanıñ temel taşlarından biri olğan saylav urriyetine qarşı kösterilgen bu qaba arsızlıqnı bütün medeniy dünya añlay. Tamam bu sebepten halqara sanktsiyalar tazyıqı devam etmek kerek, çünki bu, dünyada bir nomeralı tecavuzkârğa yol bermemek içün eñ effektiv medeniy mehnizmdir», – bildirdi Friz.
Martnıñ 1-nde Yuqarı Rada BMT Telükesizlik şurası ve Baş assambleyası, Avropa Birligi, NATO, halqara teşkilâtlar, çetel parlamentler ve ükümetlerini ilhaq etilgen Qırım territoriyasında keçirilmesi taqdirde Rusiye prezidenti saylavlarınıñ qanuniyligini tanımamağa davet etti.
Rusiye prezidentiniñ saylavı 2018 senesi mart 18 kününe – Qırımnıñ Rusiye tarafından ilhaqınıñ yıllığına tayın etildi. Onda sekiz namzet iştirak etecek – Sergey Baburin, Pavel Grudinin, Vladimir Jirinovskiy, Vladimir Putin, Kseniya Sobçak, Maksim Suraykin, Boris Titov ve Grigoriy Yavlinskiy. Rusiye prezidentiniñ saylavı ilhaq etilgen Qırımda da keçecek.
Fevral 16-da Ukraina prezidenti Petro Poroşenko dünya toplulığını ilhaq etilgen Qırımda Rusiye prezidentiniñ kelecekteki saylavı neticelerini tanımamağa davet etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
