Ukraina Tış işleri nazirligi, Qırımda martnıñ 1-nde şartlı olaraq eki yılğa azatlıqtan marum etüv ve aynı şu muddet içünde cemiyet faaliyeti ile oğraşmaqnı yasaq etüv cezasına mahküm etilgen qırımtatar faaliyetçisi Suleyman Kadırovnıñ mahküm etilmesi munasebeti ile narazılıq bildirdi.
Ukraina Tış işleri nazirliginiñ matbuat kâtibi Maryana Betsa Twitterde buña munasip bildirüv yaptı.
Betsa: «Narazılıq bildiremiz, işğalciniñ areketi – faaliyetçilerni qorquzuv, qırımtatarlarnı diskriminatsiya etüvni taqbih etemiz», – dep yazdı.
Kremlniñ kontroli altında bulunğan Kefe şeer mahkemesi Suleyman Kadırovnı, Facebookta «Qırım – Ukrainadır. Evelden edi, şimdi ola ve kelecekte olacaq» şeklinde bergen izaatı içün Rusiyeniñ topraq bütünligini bozmağa açıqtan davet etkeninde qabaatlı tanıdı.
2017 senesiniñ aprelinde Rusiyeniñ maliy monitoringi boyunca hizmeti Kadırovnı ekstremistler ve terroristler cedveline kirsetti.
Kadırov özü, cinaiy işi – öz noqtai-nazarını faal surette ifade etkenine ve aq-uquqnı qorçalav saasındaki faaliyetlerine cevaben mahsus hizmetler tarafından yapılğan provakatsiyadır, dep iddia ete.
