Avropa Birligi ilhaq etilgen Qırımda Rusiye prezidenti saylavını tanımaq niyetinde degil. Rusiye namzetleri Avropa Birliginiñ sanktsiyalar cedveline oğramaq telükesindeler. Bunı «İşğal etilgen Qırım: muqavemetniñ 4 yılı» halqara forumında Ukrainada AB temsilciligi başlığınıñ muavini Tomas Frellesen ayrıca qayd etip söyledi.
Temsilci: «Avropa Birligi halqara normalarını bozğan anneksiyanı tanımaz. Bu, bizim Qırımda saylav ve insan aqlarını kütüv boyunca beyanatlarımızda ifade etile. Avropa Birligi adalet ve barışıqnı talap ete. Biz Qırım territoriyasındaki saylavnı tanımaycaqmız. Özüni Qırım ve Aqyarnıñ vekili degen şahıslar ise Ukrainanıñ topraq bütünligi ve suvereniteti içün telüke doğurğan şahıslar olaraq bizim sanktsiyalar cedveline oğaraycaqlar», – dedi.
Fevralniñ 26-sında Kyivde «İşğal etilgen yarımada: muqavemetniñ dört yılı» dörtünci halqara forumı keçe.
Ukrainada fevral 26 kününi «Qırımnıñ Rusiye işğaline muqavemeti künü» olaraq ilân etmege teklif eteler. 26 künü, Qırımnıñ Rusiye işğaline qarşı muqavemet künü olaraq tayin etildi. 2014 senesi bu künde Qırım Yuqarı Radasınıñ binası ögünde Ukrainanıñ topraq bütünligine qol tutmaq maqsadınen miting ötkerildi. O künü miting iştirakçilerine qarşı Rusiye tarafını tutqan ve şu cümleden «Rusiye birligi» fırqasına ait olğan faaliyetçiler tura edi.
Fevralniñ 26-sında Ukrainada ve büyün dünyada Qırım sakinlerine ve Ukrainanıñ topraq bütünligine qol tutmaq içün tedbirler, munaqaşalar, forumlar, mitingler ve numayışlar yapıla.
Rusiye prezidentiniñ saylavı 2018 senesi mart 18 kününe – Qırımnıñ Rusiye tarafından ilhaqınıñ yıllığına tayın etildi. Onda sekiz namzet iştirak etecek – Sergey Baburin, Pavel Grudinin, Vladimir Jirinovskiy, Vladimir Putin, Kseniya Sobçak, Maksim Suraykin, Boris Titov ve Grigoriy Yavlinskiy.
Fevral 16-da Ukraina prezidenti Petro Poroşenko dünya cemaatını ilhaq etilgen Qırımda Rusiye prezidentiniñ kelecekteki saylavı neticelerini tanımamağa davet etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
