Ukrainada fevralniñ 26-sı, bazaertesi künü, cemaatçılıqnıñ teşebbüsinen «Qırımnıñ Rusiye işğaline qarşı tirenüv künü» olaraq qayd etile. 2014 senesi bu künü Qırım Yuqarı Şurasınıñ binası ögünde Ukraina torpaq bütünligine bağışlanğan miting ötkerilgen edi. O zaman miting iştirakçilerine Rusiye tarafdarı olğan faaller, şu cümleden «Rus birligi» firqasınıñ vekilleri qarşı çıqqan edi.
Daa evel Ukraina informatsion siyaseti Nazirligi bu künniñ resmiy dep tanılmasınen oğraşqanı ve bunen alâqalı ferman Ukraina prezidenti Memuriyetinde bulunğanı aqqında haber etken edi.
Fevralniñ 26-nda Ukraina ile bütün dünyada qırımlılarğa qol tutmaq maqsadınen devletniñ topraq bütünliginen bağlı aktsiya, muzakere, forum, miring ve yürüşler keçirile.
Fevralniñ 26-sı, bazarertesi künü, 5 Kanal, Qırım.Aqiqat, QHA (Qırım haber ajansı) ve Radio Hayatnıñ – «4 yıllıq tirenüv» adlı ortaq marafon ötkerecek.
0,Kyivniñ Mustaqillik Meydanında miting ötkerilmesi, ayrıca ukrain ve çetel siyasetçi ve memurlarınıñ iştirakinen «Zapt etilgen yarımada: dört yıllıq tirenüv» adlı halqara forum keçirilmesi planlaştırıla.
Aynı zamanda Lviv, Odessa, Çernihiv ve Herson vilâyetinde de aktsiyalar keçirilmesi planlaştırıla.
Bir kün evel amerikan PEN-merkezi fevralniñ 26-nda, bütün dünyada Rusiye apishanesinde tutulğan ukrain kinorejissörı Oleg Sentsovqa qol tutuv aktsiyası keçirmege çağırdı. Aktsiyalar, muzakereler ve Sentsov çekken filmliniñ numayışları Minsk, Parij, Warşawa, Riga, Toronto, Berlin ve Stenfordta keçecek.
Oleg Sentsov Rusiyeniñ hususiy hızmetiniñ hadimleri tarafından 2014 senesi Qırımda tutulıp alınğan edi. O, yarımadada teraktlar teşkil etüvde qabaatlana.
2015 sensi avgust ayında Rostov-na-Donu şeerinde keçken Ruisye mahkemesi Sentsovnı Qırımda terroristik faaliyet keçiriüvde qabaatlap, 20 yıllıq şiddetli apis cezasına mahküm etken edi.«Memorial» uquqimaye teşkilâtı Sentsovnı siyasiy mabüs dep tanıdı.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
