Link açıqlığı

Saatnıñ esas haberi

Geniçeskte «Qırımnıñ Rusiye tarafından işğaline qarşı muqavemet künü» munasebeti ile miting keçe (+ foto)


Geniçeskte keçken miting, Herson vilâyeti, Ukraina, 2018 senes fevral 26 künü
Geniçeskte keçken miting, Herson vilâyeti, Ukraina, 2018 senes fevral 26 künü

Qırım.Aqiqat muhbiriniñ bildirgenine köre, fevral 26-da Herson vilâyetindeki Geniçeskte «Qırımnıñ Rusiye tarafından işğaline qarşı muqavemet künü» munasebeti ile miting keçe.

Meydanda 150-den ziyade kişi toplandı. Tedbirde rayon memuriyeti ve Qırımtatar Milliy Meclisiniñ vekilleri buluna.

Şeer sakinleri «Qırım – Ukrainadır» ve «Fevral 26 – Qırımnıñ Rusiye işğaline qarşı muqavemetiniñ 1461-nci künü» plakatlarınen turalar.

Daa evel Geniçesk rayonında avtomobillerle yapılğan numayış ötkerildi. Onda Ukrainanıñ qıtadaki qısmı ve ilhaq etilgen Qırım sakinleri iştirak etti.

Fevral 26 bazarertesi «Qırımnıñ Rusiye tarafından işğaline qarşı muqavemet künü»nde 5-nci Kanal, Qırım.Aqiqat, QHA haber agentligi ve Radio Hayatnıñ «Muqavemetniñ 4 yılı» adlı ortaq marafonı ötkerile.

Fevralniñ 26-sında Ukrainada ve büyün dünyada Qırım sakinlerine ve Ukrainanıñ topraq bütünligine qol tutmaq içün tedbirler, munaqaşalar, forumlar, mitingler ve numayışlar yapıla.

Ukrainada fevral 26 kününi, Qırımnıñ Rusiye işğaline qarşı muqavemet künü olaraq tayin etmek teklif eteler. 2014 senesi bu künde Qırım Yuqarı Radasınıñ binası ögünde Ukrainanıñ topraq bütünligine qol tutmaq maqsadınen miting ötkerildi. O künü miting iştirakçilerine qarşı Rusiye tarafını tutqan ve şu cümleden «Rusiye birligi» fırqasına ait olğan faaliyetçiler tura edi.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG