Herson vilâyetiniñ Geniçesk rayonında fevral 26-da «Qırımnıñ Rusiye tarafından işğaline qarşı muqavemet künü» çerçivesinde tedbirler ötkerile. Qırım.Aqiqat muhbiriniñ bildirgenine köre, memuriy sıñır yanında avtomobillerle yapılğan numayış ötkerile. Onda Ukrainanıñ qıtadaki qısmı ve ilhaq etilgen Qırım sakinleri iştirak ete.
Geniçeskniñ merkezinde miting, siyasiy plakatlar ve fotoresimler sergileriniñ ötkerilmesi planlaştırıla. Rayondaki medeniyet muessiseleri ve umumtasil oquv yurtlarında edebiy oquvlar ve siyasiy mabüslerniñ yaşayışı aqqında fotoresimlerniñ kösterilüvi yapılacaqtır.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplinka».
В Ukrainada ve büyün dünyada fevralniñ 26-sında Qırım sakinlerine ve Ukrainanıñ topraq bütünligine qol tutmaq içün tedbirler, munaqaşalar, forumlar, mitingler ve numayışlar yapıla.
Ukrainada fevral 26 kününi, Qırımnıñ Rusiye işğaline qarşı muqavemet künü olaraq tayin etmek teklif eteler. 2014 senesi bu künde Qırım Yuqarı Radasınıñ binası ögünde Ukrainanıñ topraq bütünligine qol tutmaq maqsadınen miting ötkerildi. O künü miting iştirakçilerine qarşı Rusiye tarafını tutqan ve şu cümleden «Rusiye birligi» fırqasına ait olğan faaliyetçiler tura edi.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
