Link açıqlığı

Saatnıñ esas haberi

Ukraina Tasil nazirligi: Qırımdan kelgen studentlerniñ sayısı 30 faizge arttı


Qırımdan Ukrainanıñ qıtadaki qısmına aliy oquv yurtlarında oqumaq içün kelgen studentlerniñ sayısı 30 faizge arttı. Buña bir sıra umumtasil teşebbüsler yardım ete. Bunı «İşğal etilgen yarımada: muqavemetniñ 4 yılı» halqara forumınıñ çerçivesinde Ukraina tasil ve ilim naziriniñ muavini Volodımır Kovtunets söyledi.

Kovtunets: «Bizim vazifemiz, Qırım gençlerine ukrain tasilni almaları içün imkân doğurmaqtır. Vernadskiy adına Tavriya milliy universiteti muvafaqiyet ile Kyivde çalışa. Bu, Qırım sakinleri içün tasilge irişüv qolaylığına tesir etmeli. Keçken yılınıñ mayısında qabul etilgen qanun boyunca beş cenübiy vilâyetniñ universitetlerine Qırımdan kelgen studentlerni qabul etmeleri içün qoşumça biñ yer ayırıldı. Bunıñ neticesinde Qırımdan kelgen studentlerniñ sayısı 30-dan ziyade faizge arttı.

Mayısnıñ 16-sında Ukraina Yuqarı Radası 6116 nomeralı «Ukrainanıñ vaqtınca işğal etilgen territoriyasınıñ sakinleri olğan şahıslarnıñ tasil aluv aqqılarını temin etüv boyunca « Aliy tasil aqqında» qanunına deñişmeler kirsetüv aqqında» qanun leyhasına esas olaraq ve umumen qol tuttı. Mayısnıñ 16-sında munasip qarar içün 238 halq deputatı rey berdi. Cemiyet erbaplarında bu qanun bir sıra tenqidiy qaydlar doğurdı.

2018 senesi fevralniñ başında Ukraina Tasil ve ilim nazirligi, Rusiye tarafından ilhaq etilgen Qırımdan kelgen abituriyentlerniñ oqumağa kirmelerini qolaylaştırmaq içün Dnipro, Lviv, Kyiv, Zaporijjya, Mıkolayiv, Harkiv, Herson ve Odesadaki 35 aliy oquv yurtlarında umumtasil merkezlerini meydanğa ketirmek niyeti aqqında bildirdi.

XS
SM
MD
LG