Ukraina tasil ve ilim nazirligi Dnepr, Lviv, Kyiv, Zaporijjya, Mıkolayiv, Harkiv ve Odessanıñ 35 dane aliy oquv yurtı esasında, Rusiye tarafından ilhaq etilgen Qırımdan kelgen abituriyentlerniñ oquvğa kirmesi içün, sadeleştirilgen tasil merkezleri açmaq niyetinde.
Bu aqta bir kün ögüne keçken matbuat brifinginde Ukraina tasil naziri Liliya Grineviç beyan etti.
«Eger olarnıñ (abituriyentlerniñ –QA) Ukrainadan alınğan tasilni tasdıqlağan vesiqası olmasa ve olar tışqı mustaqil teslevde iştirak etmegen olsalar, o zaman 2016-2017 seneleri olğanı kibi biz «Qırım-Ukraina» merkezleri açacaqmız», – dep bildire Grineviçniñ sözlerini «İnterfaks-Ukraina».
Merkezler 2018 senesiniñ sentâbr ayına qadar çalışacaq, dep qayd ete o. Anda abituriyentler «tasil deklaratsiyası» toldurıp, angi fenlerni ögrengenlerini yazğan soñ, üç aylıq kurslarnı bitirip, tasil alğanı aqqında vesiqa alabileler.
«Ondan da ğayrı, aliy oquv yurtına oqumağa kirmek içün olar ukrain tili, Ukraina tarihı, zenaatınen bağlı imtian bermek kerekler», – dep qayd etti nazir.
Daa evel haber etilgeni kibi, 2017 senesi Qırım ve nezaret tışında qalğan Donbass territoriyasından kelgen abituriyentler TMT (VNO) keçmeden, «Qırım-Ukraina» ve «Donbass-Ukraina» merkezleri yardımınen ukrain aliy oquv yurtlarına oquvğa kirmege nail olğan ediler.
