Kyivde fevralniñ 23-nde qırımtatar siyaset ve devlet erbabı, birinci Qırım musulmanları Qurultayınıñ teşkilâtçısı Noman Çelebicihannıñ hatıra aqşamı keçti. Bunı Qırım.Aqiqat muhbiri bildire.
Aqşamda qırımtatarlarnıñ lideri, halq deputatı Mustafa Cemilev, Qırımtatar Milliy Meclisi reisi Refat Çubarov, Qırımtatar Milliy Meclisi reisiniñ muavini İlmi Umerov ve diger qırımtatar halqınıñ vekilleri bulundı.
Aqşamnıñ teşkilâtçılarından biri, O-Hab leyha-tasil platformasınıñ rehberi Muslim Umeroğlı: «Biz öz tarihımıznı unutmamalımız. Ondan ğayrı, menim fikrimce, diger halqlar da qırımtatar tarihınıñ eñ esas saifelerini bilse, yahşı olur edi. Bugünki tedbir zaten bu ğaye ile ötkerilgen edi», – dep ikâye etti.
İlmi Umerov, böyle tedbirlerni «nesillerniñ izçenligi» noqtai-nazarından ötkermek kerekligini qayd etti.
Umerov: «Öz halqınıñ tarihına salmaqlı isse qoşqan adamlar unutılmamalı. Bugünki hatıra aqşamı – bu, ilk evelâ, nesillerniñ izçenligidir. Noman Çelebicihannıñ tercimeialından esas basamaqları aqqında bizge qırımtatar gençleriniñ vekilleri ikâye etti. Gençlerniñ öz halqınıñ qaramanlarını unutmağanı pek muimdir», – dep qayd etti.
2018 senesi fevralniñ 23-nde körümli siyaset erbabı, XX asırnıñ başı qırımtatar milliy areketiniñ lideri Noman Çelebicihannıñ facialı ölümi kününiñ 100 yılı tola.
Noman Çelebicihan (1885-1918) – qırımtatar yazıcısı, qırımtatar milliy gimni sözleriniñ muellifi, 1917-1918 senelerinde qırımtatar halqınıñ birinci milliy tiklenüv Qurultayınıñ irmaq başlarında turğan din, cemiyet ve siyaset erbabı.
Noman Çelebicihan 1885 senesinde mollanıñ qorantasında doğdı. Bağçasaray, İstanbul ve Sankt-Peterburgda oqudı. Qırımtatar gençleriniñ maarifperver ve inqilâpçı teşkilâtlarında iştirak etti. Çelebicihan, qırımtatarlarnıñ «Ant etkenmen!» milliy gimniniñ muellifidir. Fevral inqilâbından soñ o, Qırım muftisi ve daa soñra birinci Qurultaynıñ reisi olaraq saylandı. 1918 senesiniñ yanvarinde o, bolşevikler tarafından tevqif etildi. Fevralniñ 23-nde matroslar tarafından Aqyar apishanesinde öldürildi. 33 yaşlı Noman Çelebicihannıñ cesedini deñizge attılar.
