Rusiye ükümeti, Rusiyede elektrik ağlarınıñ baş operatorı içün sanktsiyalardan qorqıp, «Rosseti» şirketini Qırımda meydanğa ketirileyatqan «Krımenergo» aktsionerler cemiyetiniñ azaları sırasına kirsetmek planlarından vazgeçtiler. Bunı, menbalardan naqil etip, fevral 20-de «Kommersant» yaza.
Soñ şekildeki konfiguratsiyasında «Krımenergo» aktsionerleriniñ cedveli şöyle olacaq: Rosimuşçestvo (Devlet mal-mülküni idare etüv boyunca federal agentlik) vastasınen 51%-i Rusiye ükümetine ve 49%-i Kremlniñ kontroli altında bulunğan Qırım ükümetine ait olacaq.
Bildirilgenine köre, böyle qararnıñ alınması içün esas sebep – «Rosseti» içün sanktsiyalarnıñ büyük ihtimalı. Şimdi şirketke qarşı sanktsiyalar asla tatbiq etilmedi.
Bunıñnen beraber, neşirniñ adı bildirilmegen suhbetdeşi, «Krımenergo»nıñ aktsionerler sermayesinde nisbet daa deñişe bile ve «mal-mülkniñ qıymeti kesilmesi ile alâqalı olacaq», dep añlattılar. «Kommersant»nıñ iddiasına köre, Rosimuşçestvoda qıymet kesilüvniñ daa başlatılmağanını bildirdiler.
Qırım.Aqiqat başqa menbalardan bu malümatnıñ tasdiqlanmasını elde etalmadı. Qırımnıñ Rusiyege tabi akimiyeti açıq menbalarda bu hususta izaat bermedi.
Fevralniñ 15-nde Kremlniñ kontroli altında bulunğan Qırım başlığı Sergey Aksönov, «Krımenergo» aktsiyalarınıñ bir qısmı kene de «Rosseti»ge keçecegini bildirgen edi.
Al-azırda Qırım elektrik ağlarını (Qırım Yaqarlıq ve energetika nazirligine ait olğan) GUP «Krımenergo» idare ete. Kelecekte onı «Krımenergo» ile birleştirecekler.
Eñ başında, «Rosseti» şirketi 75% payı ile «Krımenergo»nıñ baş aktsioneri olacaq, dep tahmin etile edi. Aqmescit musaviy saiplik planları aqqında bildire edi. Lâkin dekabrde «Rosseti» yerine Rosimuşçestvonı celp etüv şeklinde alternativ bir shema işlengeni aqqında belli oldı.
İlhaq etilgen Qırımnıñ energetika saasında eñ büyük şirketi olğan «Krımenergo», 2014 senesiniñ aprelinde «milliyleştirilgen» edi.
