Kremlniñ kontroli altında bulunğan Aqyar şeeriniñ Gagarinskiy rayon mahkemesinde açıqtan yapılğan ekstremistik faaliyetke davetlerde qabaatlanğan İgor Movenkonıñ işi boyunca qabaatlav şaatları olğan FSB hadimi ve eki studentni sorğuladılar.
Qırım.Aqiqat muhbiriniñ bildirgenine köre, sorğulanğan FSB hadimi Aleksey Mursa Movenkonıñ evinde tintüv yapqan edi. Aynı zamanda o, tintüvden soñ «suhbetlerge» davet etkenini ve psihologik tazyiq etkenini inkâr etti.
Ondan ğayrı, oturışuv esnasında «Qırım-Ukraina» grubunda bulunğan ve Movenkonıñ izaatlarını körgen eki studentni sorğuladılar. Ekisi de yazılarını ekstremistik tanıdı. Aynı zamanda şaatlarnıñ ekisi de «Qırımnıñ Rusiyege qoşulmasına» tarafdar olğanlarını bildirdiler. «Qırım-Ukraina» grubuna ise meraqlı olğanı içün qoşuldılar.
Bundan soñ oturışuvnıñ ketişatında, FSB hadiminiñ bu şaatlardan birisiniñ doğmuş ağası olğanı belli oldı, dep bildirile.
Nevbetteki oturışuv fevral 5 kününe planlaştırıldı.
İgor Movenkonı 2016 senesi dekabrniñ 16-sında yaqalap, Aqyardaki FSB idaresine alıp kettiler.
YouTube ağında sentâbrniñ 9-nda zarar körgeniniñ apayı tarafından adiseniñ yerinde çekilgen video peyda oldı. Onıñ aytqanına köre, bir erkek Movenkonı ayaqmaşinasına yapıştırılğan Ukrainanıñ «Azov» batalyonı simvolikası içün kötekledi.
Ekimler İgor Movenkoda açıq qafatası yarası, baş miyi sarsıntısı, qafatası temeliniñ qırılması, çengeniñ qırılması, burun kemikleriniñ qapalı şekilde qırılması, köz almasınıñ yaralanmasını ve diger travmalarnı tayin ettiler.
Ukraina Tış işleri nazirligi (TİN), ilhaq etilgen Qırımda Ukraina vatandaşlarınıñ taqip etilgenlerine raatsız olğanını bildirip, olarğa tazyiqniñ toqtatılmasını talap etti. Ondan ğayrı TİN halqara toplulığına, Rusiye tarafından insan aqları ve söz serbestligini bastırmaq maqsadınen totalitar usullarnıñ qullanılmasını toqtatmaq ve apishanelerinde bulunğan bütün ukrainalı siyasiy mabüsler ve reinlerniñ azat etmek içün Rusiyege qarşı imkânı olğan bütün uquqiy ve siyasiy tazyiq şekillerini tatbiq etmeleri içün muracaat etti.
