Link açıqlığı

Saatnıñ esas haberi

Aqyarda İgor Movenkonıñ işi boyunca mahkemede qabaatlav şaatlarınıñ sorğulanması planlaştırıla


İgor Movenko
İgor Movenko

Yanvarniñ 31-nde Kremlniñ kontroli altında bulunğan Aqyar şeeriniñ Gagarinskiy rayon mahkemesinde açıqtan yapılğan ekstremistik faaliyetke davetlerde qabaatlanğan İgor Movenkoğa dair cinaiy iş boyunca mahkeme oturışuvı başlandı. Bunı Qırım.Aqiqat muhbiri bildire.

Bu oturışuvda qabaatlav şaatlarınıñ sorğulanması planlaştırıla.

Qırım sakinini Rusiye Cinaiy kodeksiniñ 280-nci maddesi 2-nci qısmı (açıqtan yapılğan ekstremistik faaliyetke davetler) boyunca yapılğan cinayetten şübheli sayalar. Onı 5 yılğace muddetke azatlıqtan marum etüv şeklinde cezalandıra bileler.

İgor Movenkoğa qarşı cinaiy iş, onıñ, tahqiqatnıñ versiyasına köre, 2016 senesi yazında «VKontakte» içtimaiy ağınıñ «Qırım-Ukraina» grubunda yazğan izaatı içün açıldı.

İgor Movenkonı 2016 senesi dekabrniñ 16-sında yaqalap, Aqyardaki FSB idaresine alıp kettiler.

YouTube ağında sentâbrniñ 9-nda zarar körgeniniñ apayı tarafından adiseniñ yerinde çekilgen video peyda oldı. Onıñ aytqanına köre, bir erkek Movenkonı ayaqmaşinasına yapıştırılğan Ukrainanıñ «Azov» batalyonı simvolikası içün kötekledi.

Ekimler İgor Movenkoda açıq qafatası yarası, baş miyi sarsıntısı, qafatası temeliniñ qırılması, çengeniñ qırılması, burun kemikleriniñ qapalı şekilde qırılması, köz almasınıñ yaralanmasını ve diger travmalarnı tayin ettiler.

Ukraina Tış işleri nazirligi (TİN), ilhaq etilgen Qırımda Ukraina vatandaşlarınıñ taqip etilgenlerine raatsız olğanını bildirip, olarğa tazyiqniñ toqtatılmasını talap etti. Ondan ğayrı TİN halqara toplulığına, Rusiye tarafından insan aqları ve söz serbestligini bastırmaq maqsadınen totalitar usullarnıñ qullanılmasını toqtatmaq ve apishanelerinde bulunğan bütün ukrainalı siyasiy mabüsler ve reinlerniñ azat etmek içün Rusiyege qarşı imkânı olğan bütün uquqiy ve siyasiy tazyiq şekillerini tatbiq etmeleri içün muracaat etti.

XS
SM
MD
LG