Qırım Muhtar Cumhuriyeti prokuraturası Aqyar şeer şurasınıñ daa 6 sabıq deputatına qarşı qabaatlavlarnı mahkemelerge yolladı.
Yanvarniñ 29-nda prokuraturadaki matbuat hizmetiniñ bildirgenine köre, deputatlar Ukraina Cinaiy kodeksiniñ 111-nci maddesi 1-nci qısmı (devletke hainlik) ile közde tutulğan cinayetni işlegenlerinde qabaatlanalar.
Bildirüvde: «Cinaiy işlerniñ tahqiq etilmesi esnasında, 2014 senesi martında Aqyar şeer şurası deputatlarınıñ Qırım işğaline yardım etkenlerine ve qol tutqanlarına dair red etilmez deliller elde etildi», – denile.
Prokuraturada, sabıq deputatlar «qanunsız olaraq bir sıra qararlar qabul etti, Qırım MC Yuqarı Radasınıñ umum Qırım referendumınıñ ötkerilmesi aqqında qararına qol tuttılar, ve bunıñ neticesinde Qırım MC ve Aqyar şeeriniñ territoriyaları vaqtınca ilhaq etildi ve, ondan ğayrı, federatsiyanıñ subyektleri sıfatında Rusiyeniñ sıñırları içine kirdiler», dep añlattılar.
Muessisede: «Mezkür qabaatlanğan şahıslarğa 12 yıldan 15 yılğace azatlıqtan marum etüv şeklinde ceza berile bile», – dep qayd ettiler.
Bildirüvge binaen, yanvar 29-daki vaziyetke köre, Qırım Muhtar Cumhuriyeti prokuraturası Aqyar şeer şurasınıñ 18 sabıq deputatına qarşı qabaatlav aktını mahkemelerge yolladı.
Prokuraturada halq vekilleriniñ adları bildirilmeyler. Olarnıñ tarafından açıq menbalarda bu hususta izaatlar berilmedi.
Daa evel Qırım Muhtar Cumhuriyeti Prokuraturası, 2017 senesiniñ dekabr ayındaki vaziyetine köre, 75 sabıq Qırım Yuqarı Radası deputatınıñ qıdırılğanı ilân etildi, dep bildirgen edi.
Qırım ve Aqyar şeeri territoriyasında 2014 senesi martnıñ 16-sında yarımadanıñ statusı boyunca dünya tarafından tanılmağan referendum ötkerildi. Rusiye, onıñ neticesine esaslanıp, Qırımnı öz toprağına qoştı. Ne Ukraina, ne Avropa Birligi, ne de AQŞ referendumdaki rey berüvniñ neticelerini tanımadılar. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
