Milliy polis ve Milliy gvardiya Qırım ve Donbassnıñ işğali alıp taşlanğan soñ azat etilgen topraqlarda beraber çalışacaq ve bu sebepten şimdiden endi buña azırlanmaq kerekler. Bunı Ukraina İİN yolbaşçısı Arsen Avakov İçki işler nazirliginiñ (İİN) yılda bir kere ötkerilgen kollegiyasında söyledi.
Azatlıq Radiosı Avakovnıñ sözlerini şöyle naqil ete: «Ukraina Milliy polisi ile Milliy gvardiya şimdilik işğaletilgen territoriyalarğa kirecek vaqıtları tezden kelecek ve anda tertipni nezaret etmek kerek olacaq. İşğal etilgen territoriyalarnı azat ve muafaza etmek – pek murekkep iş ve biz bunı Lugansk ve Donetsk vilâyetleriniñ territoriyalarını azat etkende endi yapqan edik. Oña şimdiden azırlanmaq kerek».
Nazir, «diqqatnı çekip alğan sahte mitingler devri keçken soñ» şahsiy talim kerek olacaq, dep qayd etti.
Al-azırda Ukraina uquqqoruyıcı organları yalıñız Kyivniñ kontroli altında bulunğan Luhansk ve Donetsk vilâyetleriniñ territoriyasında bulunalar. Rusiye tarafından ilhaq etilgen Qırımda Kremlniñ kontroli altında bulunğan telükesizlik hadimleri areket ete.
