Keriçte Yeñi Qalede cenübiy araba qapısı kemeriniñ tış yüzünde tolalarnıñ bir qısmı tüşti. Bunı yanvarniñ 24-nde Qırım.Aqiqat muhbiri bildire.
Bu malümatnı Kremlniñ kontroli altında bulunğan Qırım Medeniyet nazirliginiñ matbuat hizmetinde de tasdiqladılar.
Matbuat hizmetinde: «Yeñi Qaleniñ cenübiy araba qapısı kemeriniñ tış yüzünde bir çatlaq peyda oldı. Bu sebepten kemerden bir qaç tış yüzü tolası tüşti. Taşıyıcı konstruktsiyalar zararlanmadı. Olarda çatlaqlar yoq», – dep bildirdiler.
Muessisede, Rusiyeniñ medeniy mirasını muafaza etüv boyunca Devlet komiteti vaqia aqqında haberdar etildi, dep qayd ettiler. Yaqın vaqıtta ekspertiza keçirilecek ve qazağa qarşı tamir işleriniñ yapılmasına ruhset almaq içün zarur olğan çareler körülecek, dep vade eteler.
Şimdi araba qapısına alıp barğan yollar qoralandı ve olardan keçüv yasaqlandı.
Yeñi Qale Keriç boğazınıñ kenarında buluna. O, XVIII asırda osmanlılar tarafından quruldı. Qale Azav deñizi ile Qara deñiz arasında gemilerniñ keçmesini kontrol ete edi.
2015 senesinde Keriçniñ esas simvollarından biri olğan Büyük Mitridat merdiveni, qısmen avdarılğanından zararlandı. Merdivenniñ bir közündeki kemer bütün meydanlığı boyunca çatladı.
