Link açıqlığı

Saatnıñ esas haberi

Kyivde «Tatlı Ses-2018» halqara qırımtatar yırı yarışı keçti


Kyivde «Tatlı Ses-2018» halqara qırımtatar yırı bala yarışı keçti. Bunı tünevin Facebooktaki saifesinde yırcı Camala bildirdi.

Yırcı: «Bu yıl umum Ukraina yarışı öz formatını halqara yarışına deñiştirdi. Onda Qırımdan, Herson, Lviv ve Kyiv vilâyetlerinden yüzden ziyade bala ve olardan ğayrı Vilnüsten kelgen artistler iştirak etti.

O, «Camaladan mahsus mukâfat»nı (professional vinil çaldırıcı Audio-Technika AT-LPT3-White ve üstünde avtografı olğan vinil şeklindeki «Podıh» («Nefes») albomını) Mavile Edemova qazandı, dep bildirdi.

Camala: «Men qırımtatar yırınıñ yañğıramağa devam etkenine ve pek çoq istidatlı icracılarnıñ peyda olğanına pek quvanam! Ğalebe ile tebrikleyim! Bundan soñ yañı muvafaqiyetler, icat, arzularnıñ kerçekleşmesini ve çastlı olmaqnı tileyim!», – dep yazdı.

Cemiyet qamaçavınıñ lideri Lenur İslâmov Facebookta, «Tatlı Ses» qırımtatar yaş istidatları yarışınıñ gala-konserti 2014 senesinden soñ birinci kere Kyivde keçti, dep bildirdi.

O, konsert ATR qırımtatar telekanalı kollektiviniñ ğayreti sayesinde keçti, dep qayd etti.

ATR, «Tatlı Ses» talant-şounı 10-dan ziyade yıl evel ötkerip başladı.

2015 senesi aprelniñ 1-nden başlap, ATR qırımtatar telekanalı ve onıñnen beraber media-holdingge kirgen Lâle telekanalı ile «Meydan» radiostantsiyası ilhaq etilgen Qırımda yayınlarını toqtattılar, çünki Roskomnadzornıñ litsenziyasını alamadılar. Aynı yılda, iyünniñ 17-sinden başlap, ATR ve «Lâle»niñ yayınları Kyivden ğayrıdan çıqıp başladılar. «Meydan»nıñ yayınları ise internette translâtsiya etilip başladı.

2017 senesiniñ dekabrinde Ukrainanıñ Televideniye ve radioeşittirüvler boyunca milliy şurası «Meydan» radiosına ilhaq etilgen Qırımda yayınlarını Astra 4A sputnigi vastasınen translâtsiya etmege izin berdi.

XS
SM
MD
LG