Qırımda yanvarniñ 20-sinde Qırım muhtariyetini ğayrıdan meydanğa ketirüv boyunca referendumnıñ 27-nci yıllığını qayd eteler. Yarımadanıñ ilhaqından evel bu kün Qırım Muhtar Cumhuriyeti Künü olaraq qayd etile edi.
2014 senesiniñ başında Qırımnıñ Rusiye tarafından ilhaqından soñ bu kün yarımadada bayram olaraq ilân etildi ve «Qırım Cumhuriyeti Künü» olaraq ilân etildi.
Kremlniñ kontroli altında bulunğan Qırım yolbaşçısı Sergey Aksönov ve parlamentniñ sözcüsi Vladimir Konstantinov Qırım sakinlerini « Qırım Cumhuriyeti Künü» ile tebriklediler.
Konstantinov özüniñ Facebooktaki saifesinde: «1991 senesi yanvar 20 kününde Qırım halqı – özüniñ medeniy ve siyasiy degerlikleri, tarihiy hatırası ve umumiy, birleştirgen maqsatları olğan bölgedeki toplulığımız doğdı, demek mümkün», – dep yazdı.
Ukraina adliye naziri Pavlo Petrenko da Qırım sakinlerini bayram ile tebriklerdi. Aynı zamanda o, «Qırım, halqara uquqnıñ bütün normalarına köre, ep Ukrainanıñ territoriyasıdır», dep qayd etti.
1991 senesi yanvarniñ 20-sinde umum Qırım referendumında, rey berüvde iştirak etkenleriniñ 93,26 faizi Qırım MSSCniñ ğayrıdan meydanğa ketirilmesi içün rey berdi. Qırımda o vaqıt yaşağan qırımtatarlarnıñ ekseriyeti qırımtatar halqınıñ liderleri ve şu cümleden Mustafa Cemilevniñ daveti ile referendumnı boykot ettiler.
Umumiy rey berüv içün «Siz SSC Birliginiñ subyekti ve Birlik muqavelesiniñ iştirakçisi olaraq Qırım Muhtar Sovet Sotsialistik Cumhuriyetiniñ ğayrıdan meydanğa ketirilmesine qol tutasıñızmı?» suali qoyulğan edi.
1991 senesi fevralniñ 12-sinde umum Qırım referendumınıñ neticeleri esasında Ukrainanıñ Yuqarı Radası «Qırım Muhtar Sovet Sotsialistik Cumhuriyetiniñ ğayrıdan meydanğa ketirilmesi aqqında» qanunını qabul etti ve 4 ay soñra 1978 senesinde qabul etilgen Ukraina SSC Anayasasına munasip deñiştirmeler kirsetildi.
1991 senesi sentâbrniñ 4-nde Qırım Muhtar Cumhuriyeti Yuqarı Şurasıniñ fevqulade sessiyası Cumhuriyetniñ devlet suvereniteti aqqında beyannameni qabul etti. Beyannamede Ukrainanıñ bir parçası olaraq uquqiy demokratik devletni qurmaq muradı aqqında söz yürütile.
1991 senesi dekabrniñ 1-nde ötkerilgen Umum Ukraina referendumında Qırım sakinleri Ukrainanıñ mustaqilligi içün rey berüvde iştirak etti. Qırım sakinleriniñ 54 faizi Ukrainanıñ mustaqilligini ilân etüv aqqında aktı içün rey berdi.
