Link açıqlığı

Saatnıñ esas haberi

Tahqiqat izolâtorınıñ hadimleri «Hizb ut-Tahrir işi» figurantına qorantasınen körüşmege imkân bermediler – faaliyetçiler


Aqmescitteki «Hizb ut-Tahrir işi» boyunca tevqif etilgen Teymur Abdullayevniñ ömür arqadaşı ve anası yanvarniñ 19-nda aqayı ve oğlu ile körüşip olamadılar. Olarnı tahqiqat izolâtorınıñ hadimleri yibermedi. Bunı «Qırım birdemligi» birleşmesiniñ Facebooktaki saifesinde tevqif etilgenniñ zevcesi Alime bildirdi.

Tevqif etilgenniñ apayı: «Tayin etilgen vaqıtta biz binağa kirdik. Kirgende bizden cep telefonlarımıznı söndürmekni rica ettiler. Biz söndürdik. Anam Teymurnı körgende, bizni Teymurdan ayırğan qalın camnı tekmil unutıp, onı quçaqlamaq içün oña qarşı çaptı. Bu duvarğa uruldı ve ağladı. Men dayanamadım ve bunı hatıra olaraq şahsen özüm içün çekmek ve aynı zamanda qocama balalarımıznıñ fotosuretlerini ve videolarını köstermek içün planşetimi çıqardım. Tahqiqat izolâtorınıñ hadimi, bunı körip, qıçırıp başladı ve meni çetke çağırdı», – dep yazdı.

Bundan soñ uquqqoruyıcı qadınnı odadan çıqardı ve körüşüvniñ olmaycağını bildirdi.

Alime: «Tahqiqat izolâtorınıñ hadimi, bundan soñ körüşmeme izin bermesin dep, maña qarşı tergevcige şikâyet yazacağını aytıp başladı. Bu ekinci körüşüvimiz olacaq edi. Birincisi 2017 senesiniñ ağustosında oldı. Teymur buña darıldı ve pek ziyade asabiylendi. O, bu körüşüvni çoq bekledi», – dep bildirdi.

Daa evel Kremlniñ kontroli altında bulunğan Qırım Yuqarı mahkemesi, Aqmescitteki «Hizb ut-Tahrir işi» figurantları Emil Cemadinov, Ayder Saledinov, Rustem İsmailov ve Teymur Abdullayev muvaqqat izolâtorda 2018 senesi fevralniñ 11-ne qadar qalacaqlar, dep qarar berdi.

2016 senesi oktâbrniñ 12-sinde Qırımda beş musulman qorantasında tintüvler yapıldı. Neticede, Rusiye ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzair Abdullayev, Teymur Abdullayev, Emil Cemadenov ve Ayder Saledinov tevqif etildi.

Fevralniñ soñunda Rustem İsmailov ve Ayder Saledinov psihiatrik ekspertizağa yollanğanları belli oldı.

«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ taqip etilüvi din alâmetine köre yapıla, dep tüşüneler. Advokat Emil Kurbedinov, Rusiye uquqqoruyıcı organları tarafından bu iş boyunca esas olaraq qırımtatarlar taqip etilip, olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruplarğa ait Qırım sakinleriniñ de taqip etilgenini qayd ete.

Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarınıñ qullanıluvını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni «terroristik» olaraq tanılğan 15 birleşmeniñ cedveline kirsetip, yasaq etti.

XS
SM
MD
LG