Link açıqlığı

Saatnıñ esas haberi

Qırım: «Fevral 26 işi» boyunca mahkemede prokuror, muhakeme etilgenlerniñ qaysı devlette areket etkenlerini söylemekte zorluq çekti


Kremlniñ kontroli altında bulunğan Tsentralnıy rayonı mahkemesinde yanvarniñ 18-nde «Fevral 26 işi»niñ baqılmasında muhakeme etilgen Mustafa Degermenci, yañartılğan qabaatlavnıñ maiyetini añlatmaq talabınen muracaat etti. O, cinayetini qaysı devlette, ne vaqıt ve tam olaraq ne yerde işlegenini, kimniñ ve nasıl buyruqlarını eda etkenini, qaysı qanunlarnı bozğanını ve diger meselelerniñ añlatılmasını talap etti.

Qırım.Aqiqat muhbiri bildirgeni kibi, prokuror, «qabaatlavnı bildirmek içün tafsilâtlı surette kösterüv kerek olmağanını» söylep, bu sualge cevap beralmadı.

Eskender Emirvaliyevniñ imayecileri, yañartılğan qabaatlav onıñ vaziyetini bayağı fenalaştıra, çünki anda Emirvaliyevniñ meydanda saat 14-ke qadar bulunğanına ve kütleviy qarışıqlıqlarda iştirak etkenine işaret etile, dep bildirdiler. Aynı zamanda Ahtem Çiygozğa dair qararda «zararlanğan şahıs, belli olmağan insanlarnen çatışması olıp, ağrı is etmedi», şeklinde qayd etile. Böylelikle, imayeniñ fikrine köre, prokuraturada yañı qabaatlav hulâsasına bu malümatnı kirsetmek içün esas yoq edi.

Ğayrıdan yapılğan sorğulamada Mustafa Degermenci nevbetteki sefer, diger muhakeme etilgenler ile tanış olmağanını, kütleviy qarışıqlıqlarda iştirak etmegenini, gaz fışqırtmağanını ve o vaqıt tanımağanı içün Ahtem Çiygoznıñ buyruqlarını becermegenini bildirdi. Ondan ğayrı o, mitingniñ eñ başında onda belli olmağan şahıs ile turmuş çatışması olğanını, ondan soñ ise uquqqa qarşı iç bir areket yapmağanını qayd etti. Uquqqoruyıcı organlar ondan bir şey talap etmediler.

Eskender Kantemirov ğayrıdan sorğulanğanda mahkemege, mitingden evel yalıñız Talât Yunusovnen tanış olğanını, lâkin onı anda körmegenini söyledi. Uquqqa qarşı areketler yapmadı, militsiya hadimleri ondan bir şey talap etmedi. Ondan ğayrı o, zarar körgen Sergey Berbenetsniñ etnik qazaq urbasında olğanını ve onı, «çurka» dep, milliy alâmetke köre aşalağanını añlattı. Kantemirov, buña açuvlanıp, onıñ şapkesini çıqardı ve yüzüne attı. Başqa iç bir areket etmedi.

Talât Yunusov ğayrıdan yapılğan sorğulamada mahkemege, Kantemirovdan başqa iç kimsenen tanış olmağanını, lâkin onı o künü körmegenini bildirdi. Aytqanına köre, zarar körgen Aleksey İvkinnen çarpışması, onıñ bir-birine qarşı turğan mitingniñ eki tarafı arasında koridor yapmaq istemegeni içün oldı. İç bir emir ve buyruqlarnı becermedi. Emirvaliyev ve Asanov ğayrıdan sorğulanğanda mahkemede daa evel bergen ifadelerine qoşacaq şeyleri olmağanını bildirdiler.

Mahkemeniñ nevbetteki oturışuvı yanvarniñ 22-sinde yapılacaq.

2015 senesinde bir grup qırımtatar faaliyetçilerge qarşı 2014 senesi fevralniñ 26-sında Qırım Yuqarı Radası binasınıñ divarları yanında Ukrainanıñ topraq bütünligine qol tutmaq maqsadınen yapılğan mitingde iştirak etkenleri içün mahkeme başlandı. Olarnı kütleviy qarışıqlıqlarda iştirak etkenlerinde qabaatlaylar.

Daa soñra mahkeme «Fevral 26 işi»ni ekige böldi: qırımtatar milliy areketiniñ liderlerinden biri Ahtem Çiygoznıñ işi, davanıñ diger figurantları olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nabiyevniñ işinden ayırıldı.

Rusiye akimiyeti 2017 senesi oktâbrniñ 25-nde Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umeriv ve Çiygoz Kyivge keldiler.

XS
SM
MD
LG