İlhaq etilgen Aqmescitte yanvarnñ 18-nde Rusiyedeki mart 18 saylavlarına öz namzetini özü köstergen Rusiye prezidenti Vladimir Putinge qol tutuv cemiyet ştabı açıldı.
Yarımadanıñ akimiyetine yaqın olğan «Krıminform» neşiriniñ bildirgenine köre, radio alıp barıcısı, terapevt ekim Boris Levin ve «Krımskiy» Rusiye taqımlarını sport ceetinden azırlav talim merkeziniñ mudir keñeşçisi Rustem Kazakov ştabnıñ yolbaşçıları oldılar.
Kütleviy haber vastası, ştabnı açqan Qırım parlamenti sözcüsi Vladimir Konstantinovnıñ sözlerini şu şekilde naqil ete: «Bu cemiyet ştabı, bu iş içün ücret almağan ve mında göñülli olaraq kelgenlerge yönetilgen. Ştab Qırımnıñ bütün bölgelerine kenişletilgen. Ştab bütün kerek olğan teşviqat ketişatını teşkil etecek».
Konstantinov, özü de göñülli olaraq Putin içün teşviqat yapacağını bildirdi.
Rusiye prezidentiniñ saylavını 2018 senesi martnıñ 18-nde – Qırım ilhaqınıñ yıllığında ötkermek planlaştıralar. Daa evel saylav kününiñ başqa künge avuştırılmasını közde tutqan munasip qanun, Rusiyeniñ Devlet duması ve Fedratsiya Şurası tarafından tasdiqlanıp, Rusiye prezidenti Vladimir Putin tarafından imzalandı.
Putinden ğayrı Rusiye prezidenti saylavında televizion alıp barıcı Kseniya Sobçak, iş adamlarınıñ aqları boyunca vekil Boris Titov, Rusiye Liberal-demokratik fırqasınıñ (LDPR) lideri Vladimir Jirinovskiy, «Yabloko»nıñ tesisçisi Grigoriy Yavlinskiy, iş adamı Sergey Polonskiy ve Rusiye Federatsiyası Kommunistik fırqası (RFKF) tarafından namzet olaraq kösterilgen «Lenin adına sovhoz» işhanesiniñ mudiri Pavel Grudin iştirak etmek niyetindeler.
Aleksey Navalnıy da saylavda iştirak etmek içün vesiqalar berdi. Lâkin Merkeziy saylav komissiyası (TSİK), muhalifniñ daa evel mahküm etilgenine sıltap, olarnı red etti. Ondan soñ Navalnıy saylavlarnı boykot etmek ve umum Rusiye narazılıq aktsiyasınıñ yapılacağını ilân etti.
